Ekaitzaren ostean barealdia datorrela diote. Orain, baina, ez dute lan makala izango itsas-gizon, ostalari, dendari eta udal arduradunek: olatuek astelehenean eragindako kalteak zenbatu eta konponketa lanetan hasteko ordua heldu zaie. Hala ere, gertatutakoen artean Uribe Kosta eskualdean larriena izango zena, Armintzan pasatzear egon zen. Asteleheneko 20:30ak aldera, portuko dikean zebilen bikote gaztea irentsi zuen olatu batek. Mutilak ontzi bati heltzea lortu zuen; neska, baina, itsasoan barrera zihoan noraezean. Hori ikusita zalantza izpirik ez zuen izan inguruan zebilen Jon Sasia suhiltzaileak eta, lehendabizi, emakumea erreskatatzera bota zen uretara, baita lortu ere. Gizonezkoari, berriz, itxaroteko esan zion, hurbil zegoen bere etxera neopreno jantziaren bila zihoan bitartean. Hamar minutu nahikoak dira horrelako baldintzetan hipotermia izateko. Baina heldu zenerako, azken hori salbu zegoen jada, beste bi lagunek bota zioten sokari eskerrak. Argazkian, Algortako Portu Zaharreko murru handiko punta olatuek apurtuta.
Beraz, sustoak susto, kalte materialak baino ez ditu eragin denboraleak Uribe Kosta eskualdean. Algortan hasita, Abra Getxo kirol portuan, pasealekuko lauxak altxatu eta zuloa egin, eta goizaldean urez gainez agertu ziren bi dendatako erakusleihoak apurtu zituen itsasoaren indarrak. Horretaz gain, olatuek Ereaga hondartzako hormigoizko baranda bere tokitik atera eta, pilatutako hare eta harrien ondorioz, errepidea ordu betez itxi behar izan zuten. Portu Zaharrean ere urak hartuta agertu zen taberna bat eta murru handiko punta txikituta amaitu zuen. Sopelari dagokionez, Arrietara hondartzako sorosleen lokalak babesteko pertsianak apurtu dituzten olatuek; baita udarako dauden dutxetako hoditeria hondatu ere. Plentzian, berriz, amarrak apurtu eta noraezean gelditu ziren lau ontzi Butroe itsasadarrean. Eta Gorlizen, hondartzako eskaileretan kalteak eragik zituen itsasoak. Azkenik, Armintzan, lau ontzi txiki hondoratu ziren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun