Ariel Dorfman antzerkigile argentinar famatuaren "El otro lado" (Beste aldea) lana antzeztuko dute larunbat honetan, martxoak 15, Algortako Getxo Antzokian. Saioa estreinaldia izango da Euskal Herrian, eta Charo Lopez (argazkian) aktore espainiarra du protagonista. Gerren eta muga politikoen zentzugabekeria du gai nagusitzat antzezlanak. Emanaldia 20:00etan hasiko da eta sarrerak salgai daude Algortako kultur etxean, BBKren orotarako kutxazainetan, www.bbk.es webgunean eta 944 310 310 eta 944 914 080 telefono zenbakietan, Getxoko Kultur Etxeko arduradunek jakinarazi dutenez. "El otro lado" tragikomediak adineko bikote baten harremanak erakusten ditu. Etxola apal batean bizi dira eta errealak ez diren bi herrien (Constanza eta Tomis izenekoak) arteko gudan hil diren soldaduak identifikatzea eta hobiratzea da euren lana. Egun batean bikotearen lan makabroa eten egiten da. Soldadu bat etxolan sartu eta muga-lerro bat marrazten du etxolaren barruan, senar-emazteen ohea erdibituta. Ordutik aurrera bikotearen bizitza erabat aldatuko da: bisa eskatu behar izango dute komunean sartzeko edota sukaldean bazkaria prestatzeko.
Ariel Dorfman (Buenos Aires, Argentina, 1942) egile ospetsuak, idazteaz gain, giza eskubideen aldeko lan handia egin du Txilen. Halaber, irakasle izan da bertoko, Holanda, Frantzia eta AEBetako zenbait unibertsitatetan. Argentinan jaio arren, AEBtan bizi izan zuen bere haurtzaroa eta 1954ean Txilera bizitzera joan zen. Salvador Allenderen gobernuaren aurkako estatu-kolpearen ondoren Frantzian atzerriratu zen eta, ondoren, Ipar Amerikan. Bere jardueran eleberriak, ipuinak, poesia, entseguak eta antzerki-lanak idatzi ditu. Azken horien artean, "La muerte y la doncella" (Heriotza eta dontzeila) aipatu behar da, Roman Polanski zinemagile ezagunak zinemara egokitu zuen-eta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun