Herenegun PSE-EEkoak izan ziren kolokan zegoen Espainiako Kongresurako Bizkaiko azken txartela eurei egokitu zitzaiela zabaltzen lehenak, Marisa Arrue Getxoko PPren bozeramailearen kaltetan. Gaurkoan, berriz, posta bidezko bozkek, Getxo udalerrian, "berriro" EAJri eman diotela garaipena jakinarazi du, prentsa ohar bidez, Udalak. Espainiako Barne Ministerioaren webgunean martxoaren 9tik hona datuak aldatu ez dituzten arren, Bizkaiko Hautes-Batzordeak jakitera emandako behin betiko emaitzen berri eman du tokiko erakundeak. Horien arabera, EAJk 14.323 (%30,41), PPk 14.321 (%30,41), PSE-EEk 12.130 (%25,75), EBk 1.612 (%3,42) eta EAk 1.127 (%2,39) boto lortu dituzte, hurrenez hurren. Abstentzioa, berriz, %27,14koa izan da, 2004ko hauteskundeak baino ia %7,10 handiagoa (%20,05ekoa izan zen orduan). Gogoratu, hauteskunde gauean PP atera zela irabazle Getxon, EAJri hiru botoko aldea ateraz. Orain, baina, 2 bozkengatik lortu dute garaipena jelkideek. Argazkian, Imanol Landa alkate getxoztarra bozkatzera zihoan unean.
Azken zenbaketen arabera, Rosa Diez buru duen Union, Progreso y Democracia alderdiak 914 boto jaso ditu udalerri getxoztarrean; Aralarrek, berriz, 725 eta Berdeek 311. Getxon, 2008ko erroldan 65.109 boto-emaile izan dira. Parte hartzea %72,86ekoa izan da eta abstentzioa %27,14ekoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun