Dekretuaren aurka, pasa den otsailaren 28an desobedientzia eguna burutu eta hainbat protesta izan ziren eskualdean, garrantzitsuena Artatza-Romo institutuan, bertan 45 bat lagunek parte hartu baitzuten, eta klasea eman beharrean manifestazioa eta eseraldia burutu zuten zentroko zuzendaritzaren aurrean. Baina, bihartik aurrera ikaskideen kontzientziazio lanaz haratago joango dira euskal Ikasleen antolakundeko kideak eta "dekretua gelditzera goaz!" ohartarazten dute.
Ekimenez beteriko ikasturtea
Baina ez da hori IAk ikasturte honetan izan duen lan ildo bakarra. Izan ere, "Euskal Ikasleon Eskubideen Karta"n jasotako hainbat eskubideen etengabeko aldarrikapena egin dute, hala nola, hizkuntz, kultur, hezkidetza, hezkuntzarako, Euskal Herrian ikasteko, baldintza duinetan ikasteko, Hezkuntza prozesuan subjektu aktibo izateko eta kolektibo gisa jarduteko eskubideak zein eskubide demokratikoak. Gainera, urtarrilean garaipen txiki bat eskuratu zuten Sopelako Ander Deuna ikastolan, DBHko 3. eta 4. mailako ikasleei baldintzekin bada ere, greba eskubidea onartu baitzieten.
Bestalde, aurreko urteen dinamikarekin jarraitu dute eta jai egun arrotzei intsumisioa egin diete, kasu honetan, urriaren 12 eta abenduan 6ko jai egun espainiarrei. Data horietan, 200 ikasle baino gehiago batu ziren propio antolaturiko herri eskoletan.
Azkenik, hainbaten etorkizuna izango den unibertsitate ikasketei begira, Bologna Prozesuak izango dituen eraginak aztertu eta zabaldu dituzte eskualdeko ikas-zentroetan eta Leioan eginiko nazio manifestazioan parte hartu zuten Uribe Kosta eta Erandioko ehunaka ikaslek.
Eskualdeko Ikasle Abertzaleen jaialdia ospatzen ari dira gaur
2008ko mar. 15a, 16:02
Uribe Kosta eta Erandioko Ikasle Abertzaleek eskualdeko jaialdia prestatu dute gaurkoan Itzubaltzeta / Romoko Itzubaltzeta gaztetxean eta dagoeneko egitarauaz disfrutatzen ari dira. Jai egun hau antolatu dute bai Lakuak darabilen DBH eta Batxilergorako dekretu berriaren aurka emandako urratsak ospatzeko eta baita borroka horretan "egin beharreko jauzirako" indarrak hartzeko ere. Den-dena, "Ikasiz, irauliz, eraikiz... borrokak egingo gaitu!" lelopean. Besteak beste, "ikasleen janzkera arautu, soin-heziketarako orduak murriztu eta ikasleek eskola ordutegitik kanpo eta institututik at zentroko arauen aurka egin ditzaketenak gurasoei salatzeko irakasleei aukera ematen dien dekretua da" Hezkuntza Sailak darabilena, Uribe Kostako IAren aburuz. Baina gaur, jai hitzordua dute eskualdeko ikasle guztiek, eta atzean utzitako poteoaren ostean honako ekitaldiak izango dira: 15:00etan bertso bazkaria (bost eurotan) Algortako Bertsolari Eskolako kide gazteekin, ondoren jolasak eta institutuen egoerari buruzko hitzaldi laburra, 20:00etan kontzertua (hiru eurotan), Alambrada eta Okupando Rom@rekin eta 24:00etatik aurrera ikasle-jaia, "jende berria ezagutu eta giro alternatibo batetaz gozatzeko" eremua. Argazkian, eskualdeko ehunaka ikaslek parte hartu zuen Bologna Prozesuaren aurka abenduaren 20an Leioako campusean egindako nazio manifestazioan.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun