Hurrengo egunetan erabateko atsedena hartu beharko du Armando Athleticeko atezain sopeloztarrak
Sevillako Guardiako Epaitegiak fidantzapeko espetxe-zigorra ezarri dio, atzo iluntzean Ruiz de Lopera futbol zelaian jokatzen ari ziren Espainiako Ligako 28. jardunaldiko partidan, botila bat botaz, Armando Riveiro Athleticeko atezain sopeloztarra zauritu zuen Betiseko zaleari. Fidantza 3.000 eurokoa da. Bitartean, jokalariak goizeko 11:30ean heldu dira Loiuko aireportura. Sopelako atezaina begia estalita eta eguzkitako betaurrekoekin agertu da. Armando adierazpenik egin gabe autobusean sartu eta jarraian Gurutzetako ospitalera eraman dute. Begian lesioa daukala eta eboluzioaren zain egon beharko duela baieztatu dute medikuek. Erabateko atsedena hartu beharko du. Bestalde, Athleticek ez du oraingoz Betisen kontrako neurri legalik hartuko. Lehiaketa Batzordearen erabakia ezagutu nahi du klubak.
Telebistan argi ikusi zenez, C.P.R. izeneko gizonezkoak harmailako lehen lerrotik urez beteta zegoen botila bota zion Armando atezainari, ateko sakea egiteko prest zegoenean. Ez zuen huts egin. Bete-betean asmatu zuen. Eskuin begiaren azpian eman zion. Zauri sakona egin zion, gainera. Athleticeko atezaina ziplo erori zen lurrera. Aurpegia odoletan zuen eta zorabiatuta zegoen. Ezin zuen jokatzen jarraitu. Athleticek hiru aldaketak eginda zituenez, partidak aurrera eginez gero, hamar jokalarirekin eta futbolari bat atezain lanetan ipinita jokatu beharko zukeen talde zuri-gorriak. Clos Gomez epaileak ez zuen aukerarik eman. Bertan behera utzi zuen norgehiagoka, amaitzeko ordu laurden faltan Athletic 1-2 irabazten ari zenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun