Ipar Uribeko eta Bilboaldeko bertsolariek jokatu zuten ostiralean, Bilboko Kafe Antzokian, Bertsolari Gazteen XVI. BBK Sariketako finala. Iluntzeko 7etan hasi eta bi ordu beranduago bukatu, bikain aritu ziren Imanol Uria, Maialen Markaida eta Jone Uria, 18 urte arteko kategorian; eta Arrate Illaro, Peru Vidal eta Itxaso Paya, 19 eta 24 urte bitartekoetan, ondoren. Hala ere, horrelakoetan epaileek izaten dute azken hitza eta horiek Oihana Bartra santutxuarra eta Itzubaltzetako bertso eskolako irakasle ohia buru zuen seikotea eman zuten irabazle. Gauzak horrela, aurtengoa dute Bilboaldekoek BBK sariketa irabazten duten lehenengo aldia, finalera beste hiru bider heldu diren arren. Argazkian, Peio Vidal bertsotan, atzean Illaro eta Paya dituela.
Finalaren ostean Begoñako basilikara oinutsik joango ote ziren Bilboaldeko bertsolariak? Txapela jantziz gero, hori egingo zutela hitz eman zuten agurrak botatzeko orduan, Kafe Antzokian bildutako 120 bat lagunen aurrean. Izan ere, lehiaketa osoan egindako ibilbideari erreparatuta, Ipar Uribeko seikotea zen faboritoa: aurretik sariketa lau bider irabazteaz gain, ALBEkoek aurtengo aurreko kanporaketa bietan nagusitu ziren, bai Lea Artibai eta bai Arratiaren aurka. Bilbo berriz, puntuazioagatik heldu zen finalera, Busturialdea eta Durangaldea bezala kanporaketa bakarra irabazi baitzuen. Gainera, behin finalera helduta, azken saio horretan gertatzen dena baino ez da kontuan hartzen saria bata edo besteari emateko. Bada, bi ordu pasatxoko emanaldiaren ostean, epaileek eman zuten berediktua: bi kategoriako puntuak zenbatuta, Bilboaldeak 415 puntu eta Ipar Uribek 388 puntu erdietsi zituzten, hurrenez hurren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun