Goizean egindako aurkezpenean, Imanol Landa alkateak herritarrak animatu ditu Getxoko Emakumeen II. Futbol Txapelketara bil daitezen, "maila handiko txapelketa delako". Horretaz ere berba egin du Jose Mari Bravo Bizkerre taldeko buruak, eta aurreratu duenez, datorren urteari begira lehiaketaren egunak aldatzea aztertzen ari dira, "ahal izatekotan, taldeen maila are handiagoa eta ikusle gehiago joatea lortu aldera".
Azkorri Txapelketa
Aurten ere, Galea kirol klubak kadete eta gazte mailako txapelketa bana antolatu du, Aste Santuko oporraldirako. XVI. Azkorri Txapelketa "oinarrizko futbolaren aldeko apustuaren froga garbia" da, taldeko arduradunen hitzetan. "Bere arrakasta agerian geratu da aurreko txapelketetan futbol talde garrantzitsuak parte hartzeaz gain, bertara ikusle kopuru handia hurbildu delako", gaineratu dutenez. Aurtengo XVI. Azkorri Txapelketan honako talde hauek izango dira: Athletic, Getxo, Leioa eta Galea, kadete mailan; eta Getxo, Leioa, Romo eta Galea, gazteetan.
Horrenbestez, asteazken honetan, martxoak 19, Athleticek eta Leioak jokatuko dute kadete mailako partida, 10:15ean. Ondoren, 12:00etan, Getxok eta Galeak izango dute gazteen arteko norgehiagoka. Biharramunean, eta ordutegi berberarekin jarraituz, Galea Getxoren aurka eta Leioa Romoren kontra lehiatuko dira, hurrenez hurren. Hirugarren eta laugarren postuetarako partidak, berriz, ostiralean izango dira. Eta azkenik, finalak, hilaren 24ean.
Getxoko Emakumeen II. Futbol Txapelketak maila handiko sei talde batuko ditu, martxoaren 21ean eta 22an, Algortako Bolua eta Fadurako udal futbol zelaietan. Bertan, Athletic, Bartzelona, Prainsa Zaragoza, Oviedo Moderno, Bizkaiko selekzioa eta, etxeko Bizkerre izango dira. Horrenbestez, bi multzotan banatuta jokatuko dute lehiaketa. A multzoan, Athletic, Bartzelona eta Prainsa Zaragoza izango dira eta, B multzoan, Bizkaiko selekzioa, Oviedo Moderno eta Bizkerre. Elkarren aurka jokatuko dute hilaren 21ean, goizeko 10etatik aurrera Boluan, eta partida bakoitzak 25 minutuko bi zati izango ditu. Hurrengo egunean, finalerdiak eta finala jokatuko dira. Finalerdiak Boluan ere izango dira 10:00etatik aurrera. Azkenik, finala, Faduran egingo dute 12:00etan, 40 minutuko bi zati izango dituen norgehiagokaren bitartez. Hala ere, ez da emakumezkoena Aste Santuan udalerrian jokatuko den futbol torneo bakarra izango. Martxoaren 19, 20, 21 eta 24ean, gizonezkoentzako XVI. Azkorri Txapelketa egingo dute, Getxoko Galea taldeak antolatuta. Argazkian, ezkerretik eskuinera, Jose Mari Bravo Bizkerre taldeko burua, Imanol Landa Getxoko alkatea eta Alvaro Gonzalez Getxo Kirolak udal erakundeko lehendakaria, gaurko agerraldian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun