Bizkaiko campusa bultzatzeko akordioan ere Bilboko Termibus inguruko parke teknologikoarentzat beste 18 milioi euro bideratuko ditu Aldundiak, hasierako 28 milioiko inbertsioa handitu eta 46 milioiko aurrekontua osatzeko. Lanak hasteko Bilboko Udalak eman beharreko baimenen zain daude unibertsitatea eta Foru Aldundia.
Azkenik, Aldundiak 595.000 euroko dirulaguntza eman dio unibertsitateari azken bi urteotan bezala 2008an "enpresa berrizale berriak sortzeari bideratutako" lanagatik. Guztira, 25 proiektu zientifiko-teknologiko lagundu dira 2006an eta 2007an Euskal Herriko Unibertsitatean. Berrikuntza eta Ekonomi Sustapen Sailaren foru funtsa hauekin finantzatuko diren gastuak ondoko hauetarako izango dira: pertsonal ikertzailea; ekipamendu zientifikoa; material suntsigarria eta bidaiak; azpikontratazioak eta bestelako gastu batzuk, berbarako patenteen erregistroa, emaitzen zabalkuntza eta abar.
Egun hutsik dagoen Plentziako eritetxe zaharrean itsas-ingurumenaren osasuna eta ingurumenaren aldaketek gizakiengan duten eragina ikertzeko zentro bioteknologikoa altxatuko da 2011n. Horretarako hitzarmena sinatu dute gaur goizean Jose Luis Bilbao Bizkaiko Foru Aldundiko diputatu nagusiak eta Juan Ignacio Perez Iglesias EHUko errektoreak. Bilbon sinaturiko akordioan jasotzen denez, Foru Aldundiak ia 7 milioi euro inbertituko ditu itsas-zentroan. Eritetxeak 2.500 bat metro koadro ditu hiru solairutan. Zentro berrian milaka litroko itsasoko ur tankeak jarriko dira, besteak beste, ikerlariek gaur egun ezinezkoak dituzten esperimentuak egin ahal ditzaten. Era berean, Foru Aldundiak beste 2 milioi euro inbertituko ditu Leioa eta Erandioko campuseko Arboretum parke botanikoa behingoz eraikitzeko. Parkeak 11 hektarea izango ditu, ospitale zaharreko lurren ondoan, Zientzia eta Teknologia Fakultatea eta Lertutxe urtegiaren artean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun