Fernando Etxegarai Plentziako preso politikoa urtarrilaren 4an atera zen Pontevedrako A Lamako espetxetik, zigor osoa beteta. Senideentzat ezustekoa izan zen, orain dela hilabeteak data horretan kaleratze eguna finkatuta izan arren, azken aldian horri buruzko berririk ez zutelako, baita egun horretarako bisita eman zietelako ere. Izan ere, beldur ziren azken hileotan hain zabalduta dagoen Parot doktrina plentziarrari ere ez ote zioten aplikatuko. Bada, Etxegarai bi hilabete eta erdi kalean eman ondoren, egi bihurtu dira familiakoen susmoak. Uribe Kostako Amnistiaren Aldeko Mugimenduak Etengabe bitakoraren bidez zabaldutakoaren arabera, plentziarra bilatu eta atxilotzeko agindua eman du Espainiako Auzitegi Nazionaleko 1. atalak, aske jartzea erabaki zuen sekzio berbera alegia. Argazkian, Etxegarai, eskuman, auzokide bat agurtzen urtarrilaren 20an Plentzian egin zioten ongi etorrian.
Kalera atera zutenerako, espetxean 20 urte baino gehiago beteak zituen Etxegaraik. Denbora guzti horretan izandako zigor murrizketak kontuan hartu gabe, Espainaiko Kode Penal berria aplikatuz, 25 urtera arteko espetxealdia bete beharko du plentziarrak; Kode Penal zaharrarekin, berriz, 30 izan daitezke. Gauzak horrela, Etxegarairi "bizi osorako espetxe zigorra" ezarri diotela salatu du Askatasunak. "Guantamo erraldoia bezala definitu daiteke espainiar eta frantziar estatuek euskal herritarren aurka indarrean duten espetxe politika. Bizi arteko zigorra, gaixotasun larriak dituzten presoak espetxean mantzentzea, isolamendua eta bakartzea, sakabanaketa, eskubide ororen ukazioa. Hau da espainiar eta frantziar estatuen espetxe politika demokratikoa, euskal militanteak giltzapean eta beraien senide eta lagunak errepidean hiltzeko apustua", adierazi du errepresioaren aurkako erakundeak. Horrenbestez, "oso larria den egoera honekin amaitzeko konpromiso sendoak hartzera" deitu ditu herritarrak eta erakundeak Askatasunak, "egoera larriak denon konpromisoa eskatzen baitu".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun