Gorka Murillo argazkilari bilbotarrak martxoaren 30era arte ikusgai izango ditu bere argazkirik esanguratsuenetako batzuk, Sopelako udaletxeko erakusgelan. Erakusketak ez du izenbururik, baina behar izanez gero, "Bildumak" izango litzateke egokiena, horiexek osatzen baitute, horrelako bost zehazki. Bere kezka eta egonezinak erakutsi nahi izaten ditu argazkien bitartez Murillok. "Pentsatzen dudana erakusten saiatzen naiz, burutik pasatzen zaidana", dio. Argazkigintza kontzeptuala egiten du, egungo gizartean oinarrituta, ohitura eta jokabideei dagokienez. "Ez dut irudia asko zaintzen, edertasunaren atzetik ez noa, nahiago dut jendeari gai zehatz batzuen gainean pentsaraztea", azaldu du artistak. Argazkian, Gorka Murillo bilbotarra bere argazkietako bat atzean duela.
Ez du kritikarik egin nahi, baina onartzen du argazkietan gizarteak atsegin ez duena erakusten duela, "gauza txarrak", alegia. Bere irudiek hartu dituzten gaiak aipatzekotan, goibeltasuna edota "reality show" batean esku hartu nahi dutenen obsesioa erakusten ditu, lan baldintzen gaineko egoerak, emakumeen bazterkeria, modaren manipulazioa edota emakumeen kontrako indarkeriarekin batera. Murillok maiz erabiltzen ditu gorputz biluziak bere argazkietan, "lana ahalik eta unibertsal eta zehatzena izan dadin", ideia zuzenean erakutsi asmoz, "ikuslearen arreta desbideratzen duten osagarririk gabe". Orain arte beti erabili ditu bildumak, serieak, azaldu nahi duen ideia hobeto erakusten duelakoan. Bilbotarrak Ingalaterran ikasi zuen argazkigintza, eta bere ibilbidean zehar Getxoarten, Fotomuseumen edota udal erakusgeletan jarri ditu argazkiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun