Julio Araluze bekara norbanakoak zein hartarako eraturiko lantaldeak aurkeztu ahal izango dira. Bigarrenen kasuan, proiektuaren arduradun-zuzendari batek ordezkatuko du lantaldea. Hautagaiei dagokionez, euskaldunek edo Euskal Herriko lurralde guztietan egoitza kreditatua izan eta eskuarki euskal kulturaren alor horietan lanean ari diren pertsonek aurkeztuko dituzten lanek izango dute lehentasuna. Lehen aipatu bezala, aurkeztu nahi direnek GITEra igorri beharko dute dokumentazio guztia, apirilaren 1a baino lehen.
Iraupena eta dirusaria
Bekak urte beteko iraupena izango du, lan amaitua bekaren onarpenetik bederatzi hilabeteko epean entregatu beharko dela. Dirusaria, berriz, 3.000 eurokoa izango da, Pertsona Fisikoen Errentaren gaineko Zergari (PFEZ) dagokion kopurua kenduta. Diru hori bi zatitan emango zaie ikertzaileei: lehena lanaren hasieran eta azkena, lana amaiturik, argitaratzeko euskarri egokian entregatu ondoren.
Julio Araluze (argazkian) algortarraren omenez, urte beteko beka sortzea erabaki du Gizarte Ikerketarako Talde Eragileak (GITE-IPES). Horren ikerketa gaiak Euskal Herriarentzat interes berezia duten gai sozial eta historikoak izango dira, zentzurik zabalenean ulertuta. Horien artean, lan argitaragabeak eta izaera propioa dutenak baino ez dira onartuko, arduradunek adierazi dutenez. Lehentasuna izango dute euskaraz sortu eta buruturiko lanek, baita emakumeen aldagaia txertatuko dutenek ere. Era berean, tokian tokiko ikerketak izan arren, gaiaren testuinguru orokorra Euskal Herria izango da. Horrenbestez, lana aurrera ateratzeko 3.000 euro jasoko dute aukeratutako lagunek. Hautagaiek apirilaren 1a izango dute epe muga oinarrietan eskatzen zaien dokumentazioa aurkezteko. Besteak beste, Getxo Biziaren sorrera unetik, ezker abertzaleko herri plataforma horrekiko atxikimendu aktibo eta militantea agertu zuen Julio Araluze "Julito" Filosofia irakasle eta GITE-IPESeko kideak. 2005eko abenduaren 17an hil zen, egun luzeak ospitalean eman ondoren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun