Urtero legez, Ostiral Santuan (bihar) egingo dute Jesusen Pasio Bizia Berangon. Gainera, iazko herri lanek eragindako aldaketak alde batera utzi eta betiko ibilbidea izango du kalbarioak. Horrenbestez, 20:30ean hasita, lehenengo pasarteak eliz parean eta Dolores Aguirreren etxe inguruko lorategietan egin ondoren, Simon Otxandategi eta Elexbide kaleak hartuko dituzte, udaletxe atzealdearaino iristeko. Bertan antzeztu ohi dute gurutziltzaketa. Orotara, 170 altorek eta 80 langilek (argi eta soinu teknikari, ile-apaintzaile eta makilatzaileak) parte hartuko du Arte Eszenikoen Lagunak kultur elkarteak antolatutako pasioaren 28. edizioan. Gutxienez Bizkaian, gauez antzezten den pasio bakarra da Berangokoa, antolatzaileek nabarmendu dutenez. Argazkian, Jesus Pilatosen aurrean.
Berangoko Pasioa Bizia antolatu eta antzezteko behar beste diru batzen arazoak izaten dituzte urtero, "Udalak eta Aldundiak ematen duten laguntza gastuen laurdena ordaintzeko ere ez baitu balio", Fernando Ansoleaga zuzendariak behin baino gehiagotan adierazi duenez. 23.500 euroko aurrekontua behar du antzezpenak. Behintzat, aurten, Aguirre Fundazioak luzatutako diru-laguntza gehitu zaio beste erakundeek emandakoari: 6.000 euro inguru, "muntaia martxan jartzeko nahitaezkoak izan direnak", antolatzaileen hitzetan. Hala ere, berdin-berdin jarri beharko dute dirua euren poltsikoetatik pasioaren bultzatzaileek. Agertoki nagusietan jarritako 500 aulkietako batean eseri nahi direnek ere diru kopuru sinbolikoa ordaindu beharko dute. Hiru ordu eta erdi inguruko antzezpenean, 3.000 eta 4.000 ikusle artean izatea espero dute antolatzaileek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun