Plastikoa, eta hortaz, plastikozko poltsak ere oso kutsagarriak dira, horri behar besteko garrantzia ematen ez zaion arren. Denbora luzea behar dute desegiteko eta, besteak beste, itsasoan, kalte egiten die animalien bizitzari. Plastiko batzuek 450 urte iraun dezakete itsasoan. Arazoa da "plastikozko poltsa horien %10 baino ez doala dagokion edukiontzira (horir), eta gainerako guztia itsasora (poltsek dortokak eta beste animalia batzuk harrapatzen dituzte; edo plastikoak jan ostean, hil egiten dira), landetara, zabortegietara... eta bidean aurkitzen duten guztia kutsatzen dute, oso bizitza luzea baitute eta desegiteko asko behar baitute", mankomunitateko iturriek azaldu dutenez.
Debekua
Beste arazo bat da poltsa bakoitza egiteko 4 gramo CO2 sortzen dela. "Horregatik, bada, konponbideak bilatzen ari dira, eta, ildo horretan, Ingurumen Ministerioak, 2010 baino lehenagorako, debekatu egin nahi ditu plastikozko poltsa horiek, eta 2009 baino lehenagorako, erdira jaitsi nahi du poltsa horien kontsumoa, hala jasotzen baita Hondakinen Plan Nazionalaren zirriborroan", diote tokiko arduradunek. Munduan, 1,2 bilioitik gora plastikozko poltsa erabiltzen dira urtean, hau da, batez bestean 300 poltsa heldu bakoitzeko edo milioi bat poltsa minutuko. Horietako gehienak bota baino 12 minutu lehenago erabiltzen dira, eta gero hamarka urtetan egon daitezke ingurumenean.
Martxoaren 15eko Kontsumitzaileen Egunaren harira, "Plastikoa pikutara!! lelopeko kanpaina abiatu zuten egun batzuk lehenago Uribe Kostako Mankomunitateko Kontsumo eta Ingurumen sailek. Uribe kostarrek plastikozko poltsak erabiltzeari utz diezaiotela bultzatzeko asmoz, behin baino gehiagotan erabil daitekeen poltsa (argazkian) bana banatzen ibili dira etxez etxe. Mankomunitateko iturriek adierazi dutenez, "oso poltsa praktikoa da erosten goazenerako. Tolestu egiten denez, diru‑zorro bihurtzen da, eta, horrela, aldean eraman dezakegu beti". Izan ere, birziklatzea "funtsezkotzat" jotzen dute tokiko arduradunek. Baina "askoz garrantzitsuago" deritzote "kontsumo arduragabea eta beharrezkoa ez dena murrizteari". Azaldu dutenez, "ekimen honen bidez, aldaketa bat proposatzen diegu herritarrei eguneroko erosketak egitean. Hain zuzen ere plastikozko poltsak ahalik eta gutxien erabiltzea, eta horren ordez, banatu dizkiegun erosketa‑poltsak erabiltzea".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun