Bihartik, ostirala, aurrera egoera meteorologikoak okerrera egingo duela ohartarazi du Eusko Jaurlaritzako Herrizaingo Sailak. Zerbitzu meteorologikoen arabera, bihar eguerdian zaparrada ahul-biziak izango dira, bereziki Kantauriko isurialdean, eta elur kota 1.000 metroren gainetik egongo da. Ipar-mendebaldeko haizea bizia izango da, zenbait gunetan bolada gogor eta oso gogorrekin, 80 eta 90 bitarteko kilometro orduko abiadura hartu ahal izango duena. Olatuen altuerak gora egingo du eta, arratsaldean, 3,5 metro inguruko altuera hartuko ei dute. Egunaren amaieran, 4,5 metroko altuera izango omen dute eta ipar-mendebaldeko hondoko itsasoak 3 metroko olatuak altxatuko dituela ziurtatu dute. Larunbaterako, berriz, zaparrada ahul-biziak espero dira, bereziki Kantauriko isurialdearen barruko aldean, eta ekaitzak eta txingorra sortu litezke, batez ere aipatutako isurialdean. Argazkian, pasa den asteko denboraleak apurtu zuen Algortako Portu Zaharreko murrua.
Larunbatean, elur kota 1.000 metro inguruan egongo da goizaldean eta, egunaren bigarren zatian, 500 metrora jaitsi liteke; hainbat tokitan 300 metrora ere jaitsi liteke, bereziki goizalde partean. Ipar-mendebaldeko haizea ahul-bizia izango da, bolada gogor eta oso gogorrekin, 70 eta 80 bitarteko kilometro orduko abiadura hartuko ei duena. Amaitzeko, olatuek 4 metro inguruko altuera hartuko dute. Hori dela eta, aurreikusitako egoera meteorologikoagatik, mendirako nahiz itsasorako aisialdi irteerak saihestea biziki gomendatu du Herrizaingo Sailak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun