Lurraldetasunean bakarrik oinarritu barik, norbanakotik hasi eta esparru sozialera zabaldu beharreko aldaketatzat jotzen dute independentzia Gazte Topaguneko antolatzaileek. "Euskaraz bizitzea, jendarte parekide baten bidean borrokatzea, Abiadura Handiz txikituko gaituen Trena gelditzea, Bologna prozesuarekin enpresarien mesedera eraiki nahi duten hezkuntzari aurre egitea; musikan, komunikazioan, hezkuntzan... gure proiektu propioak sortzea;... eta maite ditugunei maite zaituztegu esatea independentzia dira" adierazi dutenez. Guzti horren isla izango dira astelehenera bitartean egongo diren ekitaldiak.
Horien artean, Topaketa Internazionalistak egingo dituzte. "Helburua nazioartean gazte mugimenduek eta eragileek bizi duten egoera Euskal Herriratzea da batetik, eta eragile hauei gaur egun Euskal Herriko gazte mugimenduak bizi duen egoera aurkeztea bestetik", azaldu dute. Bost gairi buruzko eztabaidak egingo dituzte bertan: Europako eraikuntza eta herriak, antiglobalizazio mugimenduak, lege antiterroristak eta gizarte mugimenduak, herri proiektuak eta makro proiektuak, eta Internazionalismoa. Hegoafrika, Venezuela, Irlanda edota Palestinatik etorriko dira ordezkariak, besteak beste.
Topagunea zenbakitan
Aurreko edizioetan bezala, aurten ere funtsezkoa izaten ari da ehunaka eta ehunaka lagunen musutrukeko lana. Gazte Topagunea luzatuko den lau egunak kontutan hartuta bakarrik, 3.000 gazte inguru izango dira txanda ezberdinak beteko dituztenak. Hala ere, aurretik, ez dira gutxi izan, 2.400 metro koadroko karpa erraldoia muntatzen, 24.500 metro koadroko kanpatzeko gunea atondu edota 4.000 metrotan zehar heziak jartzen ibili direnak. Ekitaldiei dagokienez, 25 tailer eta 35 hitzaldi baino gehiago eta punta-puntako 30 bat kontzertu izango dira. Horretaz gain, zortzi txosna eta, horietatik hurbil, 62 komun jarriko dituzte, aurreko edizio jendetsuenetan 20.000 lagun baino gehiago izan direla kontutan hartuta.
"Etorkizuna independentzia" lelopean, Euskal Herri osotik joandako milaka gazteren topaleku izango da Lezo (Gipuzkoa), ostiralean hasi eta astelehenera bitartean. 1994an Etxarri-Aranatzen (Nafarroa) abian jarri zutenetik, Gazte Topagunearen zortzi edizio igaro dira jada. Belaunaldi berrien erabakitzeko ahalmena oinarritzat hartuz, Espainia eta Frantziaren "menpekotasunetik" askatu eta Euskal Herri independentea eta sozialista eraikitzeko bidean jarraitzea dute helburu ekimenaren antolatzaileek zein horrekin bat egingo duten neska-mutilek. Horrenbestez, Latzen, Etsaiak, Xikinkei, Anestesia, Sorkun & Vice Presindetes, Etam, Hesian, Banda Bassoti, Katamalo edota Desoreka bezalako taldeen kontzertu handiez gain, dozenaka ekitaldi, tailer, hitzaldi eta mahaingurutan parte hartzeko aukera egongo da Lezon; baita ikuspunpuntu kritiko zein aldarrikapen politikorako tartea ere. Argazkian, otsailaren 29an, Itzubaltzeta / Romon egindako aurkezpenaren irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun