Lezora bidean ugariak izan dira Guardia Zibilaren eta Espainiako Polizia Nazionalaren kontrolak, goizean, eta hainbat autobus geldiarazi dituzte, Gazte Topaguneko antolatzaileek jakinarazi dutenez. Herrirako sarrerak ere poliziek hartuak zeuden eta bideo kamerez grabatzen ibili dira gazteak. Hala ere, "patrolek eta helikopteroek ez dute bertaratutako jendearen animo beroa" galarazi eta 13:00etan eman diote hasiera ofiziala astelehenera bitarteko egitarauari. Ekitaldian, Txalapartaren ttan-ttakuna eta irrintzien artetik nagusitzen joan da Jon Telleria gazte independentistaren ahotsa. "Amesten dugun euskal estatu sozialista errealitate bilakatzeko egunak dira hauek", horrela laburbildu du Telleriak Lezoko Topaguneak datozen lau egunotan hartuko duen jitea. Dozenaka ekitaldi, tailer, hitzaldi, mahainguru eta kontzertu egongo dira tartean. Hau guztiaren eta beste askoren berri emango du etengabeko jarraipena eginez Gaztesareak. Argazkian, Lezo jendez betetzen / Gaztesarea.
Horrenbestez, drogen inguruko mintzaldiarekin hasi da arratsaldea Gaztetxe Gunean. Hainbat gazte hurbildu dira bertara Askagintzako kideen hitzaldia entzun eta geroko eztabaidan parte hartzeko. Droga-menpekotasunaren fenomenoaren normalizazioaren aldeko herri erakundeko kideek argi utzi nahi izan dute drogen arazoa "beraien erabileran" datzala. Kultur Gunean, berriz, euskal kulturak bizi duen "merkantilizazioari" aurre egiteko eztabaida abiatu dute hainbat eragilek. Bertan kultura herrikoia defendatzeko eta sustatzeko beharra azpimarratu dute. Gaurkoan, Latzen, Etsaiak, Gu ta gutarrak, Amaiur, Edan, Xikinkei eta Dj bull-en kontzertuak izango dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun