Ostiraleko goiza hotza eta haizetsua izan dugun arren, arratsaldean zerua guztiz estali eta euria ari du gogotsu. Asteburura begira, berriz, are giro grisagoa iragarri du Eusko Jaurlaritzako zerbitzu meteorologikoak. Giroak nabarmen egingo du txarrera; hotz handiagoa eta euri gehiago egingo du. Larunbatean zaparradak, ekaitzak eta txingorra izango dira, kostaldean bereziki. Elur-kota 1.000 metro inguruan egongo da goizaldean, baina jaisten joango da eta 500 metrotan izango da arratsaldean eta 300 metrotan gauean. Tenperatura maximoak moderatuki jaitsiko dira eta mendi inguruetan izozte ahulak izango dira. Haizeak gogor joko du larunbatean ere, 70-80 kilometro orduko abiadura hartuz eta 4 metro inguruko olatuak izango dira. Horregatik, Herrizaingo Sailak mendira zein itsasora ez joateko eta balkoietan ditugun gauzak kentzeko gomendatu du. Argazkian, pasa den asteko denboraleak apurtu zuen Algortako Portu Zaharreko murrua.
Igandean ere zerua oso hodeitsu egongo da eta zaparradak izango ditugu, baita ekaitza eta txingorra ere. Eguneko lehen partean elur-kota 400-500 metro inguruan egongo da; eta ekaitz guneetan noizbehinka 200-300 metrora jaitsi daiteke. Eguneko bigarren zatian elur-kota igo egingo da eta azken orduetan 800-900 metro inguruan kokatuko da. Iparraldeko haize bizia ibiliko da, bolada gogorrekin eta oso gogor batzuekin kostaldean eta mendi inguruetan. Tenperatura moderatuki jaitsiko da berriz ere eta barnealdean izozte ahulak izango dira. Astelehenetik aurrera pitin bat hobetzen hasiko da eguraldia. Tenperaturak gora egingo du eta horrekin batera, gora egingo du elur-kotak ere, baina euria izango dugu egun osoan zehar.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun