Uribe Kosta eta Erandion ere batasunik ez da egon Aberri Eguna ospatzeko orduan
Nazio Eztabaidaguneak deituta, milaka lagun bildu ziren atzoko Aberri Egunean, Irun (Gipuzkoa) eta Hendaia (Lapurdi) arteko ibilaldia egiteko, "Nazioa gara. Zazpiak bat. Burujabetzaren alde" lelopean. "Nazio eraikuntzan pausoak emateko, abertzaleen indar metaketa beharrezkoa" dela nabarmentzeko asmoz, herritar soilez gain, bertan izan ziren Batasuna, Eusko Abertzale Ekintza, Eusko Alkartasuna, Aralar, Abertzaleen Batasuna eta LABeko ordezkariak, besteak beste. Euzko Alderdi Jeltzaleak (EAJ), berriz, Araba, Bizkaia eta Gipuzkoako autogobernuan eman nahi duten "urrats erraldoia" aurkeztu zuen, Bilboko Plaza Barrian. Bestalde, EAk, Gernika-Lumon egin zuen ekitaldia, eta erabaki eskubidea eta galdeketa aldarrikatu zituen Unai Ziarreta EAko presidenteak. Aurreko egunean, berriz, Udalbiltza-Udalbidek Ipar Euskal Herrirako departamentua eta euskararen ofizialtasuna eta Araba, Bizkaia eta Gipuzkoarako esparru politiko berria eskatu zituen Ustaritzen. Horrenbestez, deialdi horietara uribekostar ugari batu ziren. Hala ere, eskualdean egon zen Aberri Eguna etxean ospatu nahi izan zuena: Plentziako EAJk meza, ikurrinaren igoera, aurreskua eta bazkaria prestatu zituen. Leioako Udalak, berriz, hainbat ekitaldi egin zituen udaletxe aurrean zein Boulevardean. Argazkian, atzoko Irun eta Hendaia arteko martxa / Gaztesarea.
Iñigo Urkullu EAJko EBBko presidenteak atzo Aberri Egunean berriz ere PSOEri eskua luzatu zion Araba, Bizkai eta Gipuzkoarako akordioa lortzeko, Juan Jose Ibarretxe Eusko Jaurlaritzako lehendakariak eta biek apenas aipatu zuten "galdeketa" hitza Bilbon egindako ekitaldian, eta PSOEri "diskurtso hori eraberritua" dela iruditu zaio, gaur Jose Blanco PSOEko antolakuntza idazkariak esan duenez. EAJk, atzo bere presidenteak zioenez, "urrats erraldoia" egin nahi du hiru lurralde haien autogobernuan. "Beraz, PSOEk beherapenak eskaintzen baditu, ez gaitu ondoan izango". PSOErekin erdietsitako akordioa "ona" bada, sinatu egingo dutela ziurtatu zuen, nahiz eta "ezker abertzalea, EA, ELA edo beste edonor" kontra azaldu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun