Emakumeentzako olerki, ipuin labur eta margo lehiaketak antolatu dituzte Sopelan
Emakumeei zuzendutako hainbat lehiaketa antolatu ditu aurten ere Sopelako Itzartu elkarteak. Alde batetik, olerki eta ipuin laburren sariketetan (doc) esku hartzeko deialdiak aurkeztu dituzte. Batean zein bestean, partaideek otsailaren 20a baino lehen bidali beharko dituzte lanak, euskaraz zein erdaraz, posta bidez (Landa doktorea kalea, 3 - 48600 Sopela); edo bestela Itzarturen egoitzara hurbildu. Olerkiak 4 eta 50 lerro bitartekoak izan beharko dira, eta ipuin laburrak 3 eta 10 orrialde artekoak. Bestalde, margo lehiaketa (doc) ere abian jarri dute. Horretan, egile bakoitzak, bi lan aurkezteko aukera edukiko du, olioz zein akuarelaz eginak, gaia librea delarik. Margo guztiak udaletxera eraman beharko dira martxoaren 2tik 4ra bitartean, 12:00etatik 13:30era eta 18:00etatik 20:30era. Olerki eta ipuin laburretan ez bezala, emakume sopeloztarrentzat baino ez da izango margo lehiaketa. Argazkian, Imanol Garai alkatea, aurreko batean, Itzartuk antolatutako lehiaketen sariak banatzen.
Olerki eta ipuin laburren lehiaketetan, hiruna lan sarituko dituzte gaztelaniaz zein euskaraz idatzitakoen artean; 300, 200 eta 100 euro banatuz, hurrenez hurren. Bestalde, 100 euroko sari berezia eskainiko dute banaketaren egunean errezitaldia egiten duenarentzat. Margo lehiaketan, berriz, bi sari emango dira: lehenengoa 375 eurokoa eta bigarrena 275 eurokoa. Sari banaketa Emakumeen Kultura Astearen barruan egingo dute, martxoaren 5ean, 18:00etan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun