Afrikako egoerari buruzko mahai ingurua egingo dute asteartean Algortan
2008ko mar. 26a, 13:03
“Afrikari buruzko begirada bat” izenburupean, astearterako, apirilak 1, mahai ingurua antolatu du Fundeso gobernuz kanpoko erakundeak, Getxoko Udalarekin elkarlanean. Besteak beste, Yayi Bayame Senegaleko ezkutuko inmigrazioaren aurkako borrokarako emakume taldearen presidenteak, Jose Antonio Fernandez Fundesoko Afrikarako proiektuen arduradunak, Afrikaren aldeko taldearen ordezkari batek eta Begoña Ezkurra udal lankidetza arloko zinegotziak parte hartuko dute saioan. Aipatu GKEak Afrikan egiten duen lana erakusteaz gain, Bayameren testigantzaren bitartez, "kontinente horrek bizi duen errealitateaz ohartaraztea" da ekimenaren helburua. Mahai ingurua 19:00etan izango da, Algortako Villamonte kaleko kultur etxean. Argazkian, hainbat emakume ura hartzen Senegalen.Espainiako kostaldera txalupa baten gainean heltzen saiatzen ari zela hil zitzain Yayi Bayameri semea. Harrez geroztik, inmigrazio klandestinoaren aurka dabil eta horretarako 2006ko martxoan inmigrazio klandestinoaren kontrako borrokarako emakume taldea sortu zuen. Modu berdinean seme-alabak galdu dituzten 370 emakumek osatzen dute elkartea. Jardunaldian, Afrikaren aldeko taldea Euskal Autonomia Erkidegoan egiten ari den lana ere ezagutzera emango dute. 2005eko urriaren 4an sortu zuten eta kontinente horretan lanean dauden gobernuz kanpoko 19 erakundeek osatzen dute. Guztiek Afrikaren gaineko esperientziak eta iritziak bat egiteko asmoa dute. Afrikako kontinentea bazterkeria eta txirotasun egoera zaila eta larritik ateratzeko laguntza neurri zehatzak jasotzeko duen premia ikusita sortu zuten elkarte hau.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun