“Zer arazo eta zer aukera ikusten dituzu egungo egoeran bakea eta normalizazio politikora iristeko? Ados al zaude egungo egoera desblokeatzeko hiritarrei kontsulta egitearekin?". Horiek dira Getxoko Udalak elkarrizketarako udal foroaren hurrengo batzarrerako planteatu dituen galderak. Topaketa apirilaren 9an egingo dute, 19:00etan, Algortako Villamonte kaleko kultur etxean. Foro horiek, beste udalerri askotan bezala (Barrika, Leioa eta Lemoizen, besteak beste) 2007an martxan jarri zirenak, "pertsona ezberdinen arteko elkarrizketarako gune lasai bilakatu dira", tokiko arduradunen hitzetan. "Horien xedea ez da akordioetara iristea, bakoitzak errealitateaz duen ikuspegia partekatzea baizik, baita bakerako bidean aurrera egiten nola jardun eztabaidatzea ere", azaldu dutenez. Argazkian, Juan Jose Ibarretxe lehendakaria agurtzen, Imanol Landa alkateak ere parte hartu ohi du elkarrizketarako foroan / Ilanda.info.
Horretarako, forook elkarrekin hitz egiteko eta elkarri entzuteko metodologia landu dute, "partaidetza lasai eta begirunetsua" bermatze aldera; horrezaz gainera, foro bakoitzak elkarrizketa dinamizatzen duen pertsona bat ere badu. Parte hartzen duten pertsonek euren izenean esku hartzen dute, bi orduko bilera bakar batean, eta horri buruzko aktetan idatziz egiten diren ekarpenak baino ez dira jasotzen. Parte hartu nahi duten pertsonek ondoko e-posta helbidera idatziz eman dezakete izena: udalforoak[abildua]getxo.net. Telefonoz ere egin daiteke 902 115 500 edo 665 723 141 zenbakira deituz; edota ondoko web orrialdean formularioa betez: www.getxo.net. Informazio gehiago eskuratu nahi izanez gero, www.konpondu.net web orrialdera jo.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun