Espainiako segurtasun indarrek burututako azterketa zientifikoak aipatuz, ihes eginda dagoen Arkaitz Goikoetxea algortarrari egotzi dio Europa Press albiste agentziak, martxoaren 21ean Calahorrako (Errioxa, Espainia) Guardia Zibilaren kuarteletik gertu jarritako bonba-autoaren berri emanez, ETAren izenean Bizkaiko DYAra deitu izana. Grabazioaren azterketak "argi utzi du ahotsa su-etena hautsi eta ondorengo atentatu gehienetan parte hartu duen Bizkaiko komandoko kidearena dela", iturri horien arabera. Eztanda egin zuen autoa bertan jartzea, berriz, Jurdan Martitegi durangarrari leporatu diote. Eta Honda Civic urdina jabe zen bikoteari kotxea lapurtzea eta horiek zaintzea beste bi laguni. Horretaz gain, martxoaren 7an Arrasaten jazo zen Isaias Carrasco PSE-EEko zinegotzi ohiaren hilketaren egilea talde hori izan daitekeela dio Espainiako Barne Sailak. Are gehiago, "lekuko baten adierazpenetan oinarrituta", Goikoetxeari berari leporatzen diote Carrasco tirokatu izana. "Hala ere, identifikazio hori ez da erabatekoa, pistoladunak bizar faltsua baitzeraman", gaineratu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun