Gizarte larrialdietarako laguntza eskatu zuten 590 erandioztarrek 2007an

Erandioko Udaleko Gizarte Ekintza Sailak gizarte-larrialdietarako 590 laguntza eskari izapidetu zituen iaz. Horietatik 480 onetsi zituen, tokiko iturriek adierazi dutenez. Horien artean, etxebizitzaren alokairua ordaintzeko laguntzaren bat jaso zuten 237 pertsonek, "etxea utzi beharrean aurkitzeko arriskuan zeudelako". Emandako datuen arabera, emakumezkoak dira laguntzak eskatzen dituzten gehienak: 435 emakumek aurkeztu zuten laguntza eskaria eta 155 gizonezkok. Bestalde, 667 familiak eskuratu zuen oinarrizko errenta. Guztira 1.401 pertsona izan dira Gizarte Ekintzako udal zerbitzuen onuradun. Etxeko eguneroko bizimodua egiteko laguntza eman zieten 25 etxeko laguntzailek 65 adinekori. Etxeko laguntza zerbitzuaren hartzaileen %88 emakumeak izan dira. Argazkian, aiton-amona bikotea Erandion paseatzen.