Elikagai-erabiltzaile agiria eskuratzeko ikastaroak antolatu dituzte Sopelako ostalariek
2008ko mar. 27a, 13:25
Sopelako Merkataritza, Ostalaritza eta Zerbitzuen Elkarteak elikagai-erabiltzaile karneta lortzeko ikastaro trinkoak antolatu ditu, bi mailatan bereizita. Alde batetik, sukaldariei zuzenduta, arrisku handiko elikagai-erabiltzaile agirirako sei orduko ikastaroa eskainiko dute, martxoaren 31n eta apirilaren 2an, 17:15etik 20:15era, udaletxeko Hall Kulturalean. Sopeloztarrek ez ezik, Urduliz eta Barrikako profesionalek ere esku hartu ahal izango dute honetan. Hala ere, partaide kopurua hamabi lagunera mugatu dute, udal iturriek adierazi dutenez. Bestalde, gehien jota, hamalau zerbitzarik parte hartu ahal izango duten arrisku txikiko karneta ateratzeko hiru orduko mintegia apirilaren 2an ere egingo da, 17:15etik 20:15era, Hall Kulturalean. Aurretik, baina, merkatariek izango dute horretarako aukera, 14:00etatik 17:00tara, udal euskaltegian.Badira zenbait urte era honetako ikastaroak abian jarri zirenetik. Hala ere, asko dira oraindik jakin-mina eta beharra duten Sopelako profesionalak. Raquel Lobon Merkataritza, Ostalaritza eta Zerbitzuen Elkartearen presidentearen aburuz, “oraindik karneta ez duten sukaldari eta zerbitzari asko daude udalerrian, nahiz eta derrigorrezko betekizuna izan”. Bere hitzetan, dendariak dira “uzkurrenak” ikastaroetara joaterakoan. Horren erakusle, aurten, “bost lagunek esku hartuko dutela soilik”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun