Esan bezala, eraikinen gaineko lanak Enplegu Tailerreko ikasleek egingo dituzte. Ekimen horretan 25 urtetik gorako gazteek parte hartzen dute, trebatu eta gero, praktika lanetan hasteko soldata txiki baten truke, udal arduradunek azaldu dutenez. Gehienetan, ondare historikoaren gainekoak izaten dira horiek. Orain arte, Mendilibe jauregia, Elexalde errota eta Artatzako jauregian ibili dira beharrean. Ondizko dorretxea, berriz, 2009an hasiko dira atontzen eta lanok hiru urte luzatuko direla uste dute tokiko agintariek. Eneko Arruebarrena alkateak atzo aitortu zuenez, dorretxea berreraikitzea "ez da merkea suertatuko, materialez gain, irakasle eta ikasleei soldatak ordaindu behar zaizkiolako". Hala ere, ekimena mesedegarritzat jo du Leioako Udalak, "batetik, gazteen trebakuntzaren alde egiten jarraitzen dugulako; eta bestetik, udalerriko ondare historikoa leheneratzeari ekingo diogulako, Bizkaiko ibilbide turistikoaren barruan kokatzeko asmoz". Egitasmoaren aurrekontua milioi bat eurokoa izango da.
XVI. mendekoa
Lan horiek aurrera ateratzeko, dorretxearen jabe den familiarekin akordio batera heldu da Udala. Arruebarrenaren hitzetan, "oraingoz behin-behinekoa da hitzartutako erabilera emakida; baina hori behin betikoa izango da eremu horretako lur zatitzea egiten dugunean. Horrela, etxea konpontzeaz gain, parkea handiagotuko dugu; baita gotorlekuaren aztarnak berreskuratu ere". Azterketa sakona egin ostean, Ondizko dorretxea XVI. mendeko dela ziurtatu dute adituek, 1.515 ingurukoa hain zuzen, orain arte zaharragoa zela uste bazen ere. Ikerketak aipatzen duenez dorretxea baino landa-jauregia zen Ondizekoa, familia aberats batena. Leioako eraikin zaharrenetariko horren azalera 84 metro kuadrokoa da, eta 8,5 edo 10 metroko altuera izango du obrak bukatzean, solairu bat ala bi egingo duten ez dakitelako oraindik. Alkateak aurreratu bezala, lan horiek amaitzerakoan, 2011 inguruan, Aketxeko Kortasena baserria leheneratzeari ekingo diote Enplegu Tailerreko ikasleek.
Espainiako Enplegu Institutuaren (INEM) laguntzaz, "udalerriko ondare historikoa leheneratzeko lanak" egiten jarraituko du Leioako Udalak, atzoko prentsaurrekoan, Eneko Arruebarrena alkateak iragarri zuenez. Aurten, gaztetxe zen eta egun Txakolinaren Museoa dagoen Mendibile Jauregiaren konpontze lanen hirugarren fasea egiten ari dira Enplegu Tailerreko ikasleek eta, datorren urtera begira, Ondizko dorretxea berreraikitzeari ekingo diote. Hain zuzen ere, eraikin mota horren irudiak ordezkatu du Leioako armarrian gaztelu batek hartzen zuen lekua, "udalerrian gaztelutik ez, baina dorretxea egon delako eta badagoelako", tokiko iturrien arabera. Horrela erabaki zuten azken udal osoko bilkuran. Armarri berria oinarri hartuta aukeran dauden hiru bandera ereduetatik bat hartzeko, berriz, Elkar Hazi proiektuan parte hartzen ari diren "eskola-umeen iritzia kontuan" izango dute, nahiz eta azken erabakia udalbatzak hartuko duen. Argazkian, Eneko Arruebarrena alkatea armarri berriaren irudia eskuan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun