Ertzainek kreditu txartelen datuak egiaztatu eta gero jakin zutenez, horien jabeak salaketa jarri zuen, herenegun goizean bertan txartelak eta bestelako dokumentazioa gordetzeko erabiltzen zuen poltsa lapurtu baitzioten. Banketxeekin hitz eginda, gainera, ostutako txartel horiek erabiliz ia bi mila euro gastatu zituztela jakin zuten. Atxilotutakoaren autoa miatzean, berriz, ostutako txartelak erabiliz erositako hainbat gai topatu zituzten, bilgarri eta guzti oraindik, polizia iturriek diotenez.
Lapurtutako kreditu txartelekin erosketak egitea leporatu diote Erandioko gazte bati
Ertzaintzak N.A. 25 urteko erandioztarra atxilotu zuen ostegun arratsaldeko lauretan Barakaldon, iruzur delitua egitea egotzita. Eusko Jaurlaritzako Herrizaingo Sailak zabaldutako bertsioaren arabera, bertako merkatalgune batera joateko abisua jaso zuen polizia autonomikoak, segurtasun zaindariek pertsona bat atxikita zeukatelako, berea ez zen kreditu txartel batekin ordaintzen saiatu eta gero. Ertzainak heldu zirenean, zaindariekin hitz egin zuten eta, jarraian, susmagarria identifikatu eta arakatu egin zuten. Beste pertsona baten izenean zegoen kreditu txartela eta bi establezimendutan egindako erosketen tiketak atzeman zizkioten, polizia iturriek diotenez. Halaber, zaindariak beste kreditu txartel bat ere eman zien ertzainei: bertan erosketa egiten saiatzeko erabili omen zuena. Atxilotu duten arte, guztira ia bi mila euroko balioa duten gaiak erosi ditu Barakaldoko eta Erandioko hainbat saltokitan, Herrizaingo Sailak gaineratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun