Recreativoren aurka gaur arituko diren jokalarien izenak ezagutzera eman zituen atzo Joaquin Caparrosek. Athleticeko entrenatzaileak ez zuen zalantzarik izan Armando Riveiro sopeloztarra Huelvako taldearen kontra hasieratik jokatuko duen hamaikakoan jartzeko, bere lesioak bilakaera normala izaten ari dela kontutan hartuta. Senda-agiria jaso du dagoeneko atezainak. Hala ere, asteartean, apirilak 1, berriro egingo diote azterketa medikoa. Martxoaren 15ean Ruiz de Lopera futbol zelaian jokatzen ari zirela, Riveirori botilakada eman zion Betiseko zaletu batek, begian zaurituz. Hasieran atxilotu, baina 3.000 euroko fidantza ordaindu eta gero irten zen kalera C.P.R. erasotzailea. Oraingoan Biolentziaren Aurkako Batzordeak 10.000 euroko isuna eta kirol-ikuskizunetarako sartzeko bi urteko debekua eskatu du berarentzat eta epaiketa ere egingo diote Sevillan. Betisentzat, ordea, ez du zigorrik eskatu Biolentziaren Aurkako Batzordeak. Gaurko partida 17:00etan izango da, Nuevo Colombino futbol zelaian. Erabakigarria izan daiteke gainera, garaipena lortuz gero, Lehenengo Mailan beste urte batez jarraitzea ia ziurtatuta edukiko lukeelako Atheticek. Argazkian, ohatilan atera zuten Armando Ruiz de Lopera futbol zelaitik / Periodista Digital.
Betisen eta Bartzelonaren arteko norgehiagoka Ruiz de Lopera futbol zelaian jokatu zen atzo azkenean, Kirol-Diziplina Batzordeak Sevillako taldeari ezarritako bi partidatako zigorra bertan behera utzi ostean. Behin-behineko erabaki horrek bere zelaian jokatzea ahalbidetu dio Betisi jardunaldi honetan. Hala ere, sevillarrek aurkeztutako helegitearen gainean erabakia hartu eta zigorra mantentzen duen ala ez adierazi beharko du Kirol-Diziplina Batzordeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun