Ertzaintzak A.G.G. 28 urteko gizonezkoa atxilotu zuen atzo eguerdian, Areetako metro geltokian, "eraso delitu bat egin izana leporatuta". Eusko Jaurlaritzako Herrizaingo Sailak zabaldutako bertsioaren arabera, 12:30ak inguruan, gaztea geltokira bidai txartelik gabe, txartelak balioztatzeko makina baten gainetik salto eginda igaro zela antzeman zuen geltokiko ikuskatzaileak. Hori dela eta, garraioa erabili nahi izanez gero txartela ordaindu beharko zuela esan eta egindako aurpegiratu zion Metro Bilbao enpresako langileak. Ustezko erasotzailea hasieran geltokitik joan eta, handik gutxira itzulita, ikuskatzailea bizkarrean mailu batez jo zuela adierazi dute polizia iturriek. "Orduan, artatzen ari zen bidaiari baten laguntzaz, biktimak erasotzailea mendean hartu zuen, baina horrek berriz jo zuen atzamar batean. Erasoa ikusi zuten beste hainbat pertsonek Ertzaintza heldu arte atxiki zuten erasotzailea", gaineratu du Herrizaingo Sailak. Metro Bilbaok, baina, atzokoa "eraso saiakera" izan zela adierazi du gaur zabaldutako oharrean. Garraio enpresaren arabera, laguntza eskatu zion emakume batekin zegoen ikuskatzailea mutila berriro agertu zenean. "Gaztea ikuskatzailea mailuarekin mehatxuka ikusi eta jotzeko asmoa zuela ohartzean, emakumea eta geltokian zeuden beste pertsona batzuek Metro Bilbaoko langileari laguntzera joan ziren berehala. Jendeak, kasualitatez Imanol Landa Getxoko alkatea ere tartean, gazteak ikuskatzaileari eraso egitea saihestu zuen", adierazi dute metroko arduradunek.
Herritarren laguntza eskertu nahi izan du gaur Metro Bilbaok. "Eraso ahalegina jasandako biktimak eta Metro Bilbaok orokorrean" goraipatu egin dute "pertsona horiek gizalegez jokatu eta erantzun zutela, Metro Bilbaoren urteko 85 milioi erabiltzailerik gehienak bezala, gizartearen mesedetan aritzen garenokin errespetuz eta modu eredugarrian jardun baitzuten". "Eskerrik asko, berriro ere, herritar horiei, gutxi batzuen bandalismoa denon arazoa dela ulertu dutelako, eta Metro Bilbao bezalako zerbitzu publiko bat denon eta denontzako zerbitzua dela barneratzeagatik. Eskerrik asko, halaber, erasotzeko arriskuan egon den lankideari, bere profesionaltasunarengatik, eta Ertzaintzari, bere prestutasunarengatik", adierazi dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun