Beste behin ere Alkarbide Bizkaiko euskara zerbitzuen bilguneak koordinatutako "1+1=bi" lelopeko kanpainarekin bat egin du Getxoko Udalak. Horren bidez, B eta D ereduei buruzko informazioa emango zaie 2 eta 3 urte arteko seme-alabak dituzten gurasoei eta, batez ere, beste herrialde batzuetatik gurera bizitzera etorri diren familiei. Orotara, 2.000 sendi getxoztarri zuzenduta dago, Bizkaiko beste 44 udalerritan (Uribe Kosta eskualdekoak eta Erandio tartean) abian jarri duten kanpaina. Tokiko erakundeak emandako datuen arabera, 2007-08 ikasturtean, Getxoko aita-amek 2.193 ume matrikulatu zituzten Haur Hezkuntzan (0-5 urte). Horietatik %61 D ereduan, %18 B ereduan eta %21 A ereduan. Lehen Hezkuntzan (6-11 urte), berriz, 2.893 ikaslek eman zuten izena: %49 D ereduan, %27 B ereduan eta %24 A ereduan.
Eskolaratze sasoian dauden haurren gurasoei banatu zaien liburuxkan, euskal hezkuntza sistemari buruzko informazioa eta hainbat aholku eta gomendio jasotzen dira. "Euskarazko irakaskuntzak etorkizunari begira dituen abantailak ere aipatzen dira bertan: bi edo hizkuntza gehiagotan hitz egiteko, lana errazago topatzeko edota kultura bat baino gehiago ezagutzeko aukerak, besteak beste. Gainera, hizkuntza bat baino gehiagotan aldi berean hitz egiteak dituen abantailen berri ere ematen da, bi hizkuntza erraztasunez ikasten dituzten ikasleek emaitza hobeak izaten baitituzte ikasle elebakarrek baino. Halaxe erakusten dute hainbat herrialdetan egindako ikerketa pedagogikoek", azaldu dute udal iturriek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun