Getxoko Andra Mari kiroldegian hartu dituzte goizean Algortako kaira gaur iritsi den Saga Rubi ontzian etorritako Erresuma Batuko 600 lagunak (guztiak 65 urtetik gorako pentsionistak dira eta bidaiarien batez besteko adina 77 urtekoa da). Bi txandatan banatuta, zesta-punta, txalaparta, haizkolaritza eta harrijasotze ikuskizunez gozatzeko aukera eduki dute bertan. Ondoren, Bizkaiko Zubira eraman dituzte Gizateriaren Ondarea izendatutako monumentua ikusteko. Azkenik, Bilbora joan dira Guggenheim museoa ezagutu eta Bizkaiko hiriburuaren ikuspegiaz gozatzeko Artxanda gainetik. Londreseko Denis Carter turistak adierazitakoaren arabera, ostiral arratsaldean atera ziren Southampton-etik (Ingalaterra) eta gaur goizean esan diete gurera heltzear zeudela. Aurretik, beste bi geldialdi egin dituzte Frantzia aldean. Hain zuzen ere, horixe da bidaiaren gakoa: ezustekoa. "Ondo dago itsasontzira heldu eta hurrengo geldialdia non egingo duzun ez jakitea", azaldu du ingelesak. "Maletan zer sartu ere ez genekien hasieran", aitortu duenez. Argazkian, turistak haizkolaritza saioaz gozatzen.
Hamabi egunez luzatuko da Saga agentziak antolatutako bigarren itsas-bidai "misteriotsua", Carlos del Rio turismo-gidariak azaldutakoaren arabera, eta aurten 10 portutan egingo dute geldialdia. "Zein ordutan gozaldu eta afalduko duten baino ez dakite bidaiariek. Izan ere, ezustekoak hartu eta dibertitzea da bidaiaren helburua", Del Riok azaldu duenez. Itsasontzi barruan ere jolasak egiten dituzte, batzuek hildakoen eta gainontzekoek hiltzaite eta detektibeen papera eginez. Bere aldetik, "Getxo udalerriari turismorako ateak zabaltzen" ari zaizkiola adierazi du Aitor Soloeta zinegotziak. Saga ontzia 17:30ean aterako da Getxoko kaitik, ezagutzen ez den norabidean. Datorren igandean, hilak 6, berriz, Black Prince izeneko denboraldiko bigarrena helduko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun