Latzen taldearen Infernuko Ateetan Tour izeneko birak azken kontzertua izango du larunbat honetan, apirilak 5, Algortako Portu Zaharrean. Getxoko Udalak antolatutako Kantuketan 2008 musika jardunaldien harira, Lor bermeotarren ostean eskainiko du saioa Oñatiko laukoteak. 1999ko abuztuan desegitea erabaki eta gero, Latzenen indarra berreskuratu eta zuzeneko kontzertu jakin batzuk emateko elkartu ziren berriro, orain hilabete batzuk, Gorka Lazkano (bateria), Joxemari Azpitarte (baxua), Iker Martinez de Zuazo (kitarra) eta Aitor Uriarte (ahotsa eta kitarra), "entzuleek merezi duten bezala agur esateko asmoz". Lor talde gaztea bestalde, Elorrion sortu zen eta 2003an argitaratu zuen "Lor" izeneko lehen diskoa. Rockaren indarra eta doinu ezti-goxoak nahasten ditu. Proiekzio handienetakoa duen euskal taldea izatera iritsi da. Aurreko azaroan argitaratu zuten bigarren lana, "Bakoitzari berea". Latzen eta Lorren kontzertua 20:00etan hasiko da Portu Zaharrean jarritako karpan, sarrera doan. Argazkian, azaroan Bilboko Kafe Antzokian izandako kontzertua / EHko Freelance
Bestalde, apirilaren 12an, 19:00etan, Euskal Kantu Txapelketa Bizkaian 2008 abiatuko dute, Areetako Andres Isasi musika eskolan, saiorako sarrera doakoa ere dela. Mikel Urdangarin, Mikel Markez, Ene Bada taldea eta Estibaliz Asua dira txapelketa honetatik pasa diren kantari ezagunetako batzuk. "Kantari berriak ezagutarazi, euskal kantaren ohiturari eutsi eta kantu zaharrak berreskuratzea" dira txapelketaren helburuak, kultur iturri getxoztarren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun