Apirilaren 12an eta 13an Portugaleten egingo diren Euskal Herriko IV. Jardunaldi Feministen berri emateko asmoz, aurkezpena eta luntxa izango dira ostiral honetan, hilak 4, 20:30etik aurrera, Algortako Villamonte kaleko kultur etxean. "Feministok eraldaketarako borrokan!" lelopean, EHUk Portugaleten duen fakultatea aukeratu dute jardunaldiak egiteko eta, bertan, indarkeria sexista edota emakumearen identitatea izango dira eztabaidagai. Emakume Internazionalistak, Plazandreok, Bizkaiko eta Arabako Emakume Asanbladak, Medeak, Herne, 7menos20, Bilgune Feminista, Lanbroa eta Amalatz eragileek osatzen duten Euskal Herriko Koordinadora Feminista da antolatzailea; eta ekimen honekin "euskal emakumeak bildu, iritziak partekatu eta eztabaida sustatu" nahi dute. Jardunaldietan parte hartu nahi duenak, www.jardunaldifeministak.org webgunearen bidez izena eman ahal izango dute, horretarako 15 euro ordaindu beharko direla. Argazkian, jardunaldien aurkezpena / Gaztesarea.
Euskal Herriko IV. Jardunaldi Feministek hiru ardatz izango dituzte antolatzailek azaldu dutenez. Lehena, "Emakumeak Euskal Herrian eta munduan" izenekoa eta bertan eztabaidatuko diren gaiak, besteak beste, zaintza, prekarietatea edota parte hartze sozio-politikoa izango dira. Indarkeria sexistak ere lekua izango du eta prebentzioaz, legeriaz eta eman beharreko erantzunaz jarduteko beta izanen dute Portugaletera bertaratuko diren emakumeek. Azken atalak, berriz, "Emakume identitate eta gorputz intsumituak" izango du goiburu eta sexualitateaz, prostituzioaz edota abortuaz hitz egingo dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun