PSOEren espetxe politika "anker eta hiltzailea" salatu dute dozenaka herritarrek
Uribe Kostako Amnistiaren Aldeko Mugimenduak egindako deialdiari jarraituz, dozenaka herritar elkartu ziren atzo iluntzean eskualdean, PSOEren gobernuak darabilen espetxe politika "anker eta hiltzailea" salatzeko. Besteak beste, Algorta, Berango, Erandio, Itzubaltzeta / Romo, Leioa, Sopela eta Plentzian egindako elkarretaratzeek Fernando Etxegaraik bizi duen egoera gaitzestea izan zuten ardatz; espetxean 26 urte daramatzan Jon Bilbao Moro asuarra eta Anjel Figueroa Fernandez preso gaixo algortarra ahaztu gabe. Beste 27 euskal preso politikori egin bezala espetxealdia luzatu nahi diote Barakaldon jaio eta Plentzian lekututako lagunari. Etxegarai urtarrilaren 4an atera zen Pontevedrako A Lamako espetxetik, zigor osoa beteta. Bada, bi hilabete eta erdi kalean eman ondoren, plentziarra bilatu eta atxilotzeko agindua eman zuen Espainiako Auzitegi Nazionaleko 1. atalak, aske jartzea erabaki zuen sekzio berbera alegia. Etxegarairi Parot doktrina gisa ezagutzen den 197/2006 jurisprudentzia ezarri (zigor murrizketak kontuan ez hartzea), eta beste lau urte eta hiru hilabete preso egin behar dituela jakinarazi diote. Bihar bertan mobilizazioa izango da, 13:00etan, Plentziako Astillero plazan, guzti hori salatzeko. Argazkian, 130 lagunek parte hartu zuten Algortako Telletxe plazako elkarretaratzean.
"Horrelako neurri kriminalekin, presoen suntsipen fisikoa eta psikologikoa bilatzea" egotzi dio PSOEri Amnistiaren Aldeko Mugimenduak. EAJ eta NaBai "euskal indar erregionalistei", berriz, lan horretan laguntza ematea leporatu diete. "Errepresioaren estrategia horretan pieza garrantzitsua dira, abertzaletasunaren izenean, estrategia errepresiboaren babesleak. Beti ere, PSOErekin batera, ezker abertzalearekin amaitu eta independentziarako aukera erreala herri honi betirako ixteko estrategian bat egiten dutenak", AAMren arabera. Hala ere, estrategia hori "antzua" dela ohartarazi die errepresioaren aurkako erakundeak: "azken 30 urtetan ari dira herri hau errepresioaren bidez isilarazi nahian; ez dute lortu eta ez dute lortuko", adierazi dutenez. Hartara, presoen eskubideen defentsan konpromiso sendoak hartzeko deia luzatu diete herritar, eragile eta erakundeei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun