Mobilizazioaren ostean, Amnistiaren Aldeko Mugimenduko kideek salatu zuten Espainiako Estatuak darabilen "salbuespen egoera" eta azken urtean bizitutako atxiloketak, sarekadak, torturak eta ilegalizazioak gogoratu zituzten. Eskualdeari dagokionez, Etxegarairen kasuaz gain, nabarmendu zuten 26 urte espetxean daramatzan Jon Bilbao Moro eta gaixo larri eta sendaezina den Anjel Figueroaren kasuak, "espetxe politika hiltzailearen adibide krudelak".
Egoera hori, marko politikoari buruzko eztabaida nagusian kokatu zuten, Euskal Herriak lurraldetasuna eta erabakitze eskubidea izango duen estatus berriari PSOEk, "indar erregionalisten babesarekin", ateak itxi nahi dizkiola esan baitzuten AAMko kideek. Baina, ohartarazi zutenez, "ezinezkoa" egingo zaie "herri hau isiltzea".
Askatu.org-eko oharra:
Bizi arteko zigorraren amaiera eskatu dute Plentzian ehundaka herritarrek.
Fernando Etxegarai bilatze eta atxilotze agindua duen euskal herritarrak parte hartu du manifestazioan. Bide batez Amnistiaren Aldeko Mugimenduaren aurkako epaiketak presoekiko elkartasuna ezabatu nahi duela salatu dute. Mobilizatzeko deia egin dute.
Asteburu honetan hainbat mobilizazio burutu dira Fernando Etxegarairen eskualdean bizi arteko zigorraren aurka Amnistiaren Aldeko Mugimenduak deituta. Pasa den astean Askatasunak eman zuen prentsaurrekoan espetxeetan bizi den egoera larriaren berri eman zuten eta besteak beste Fernando Etxegarairi gertatu zaiona salatu zen, 20 urte espetxean eman ondoren beste 4 urterako espetxeratzeko agindu baitu epaileak.
"Euskal Herriak askatasuna behar du" lelopean, Plentziako eta inguruko herrietako 300 bat auzokideek Fernando Etxegarai eta beste 26 presori "bizi arteko zigorra" ezarri dietela salatu zuten atzo Astillerotik abiatutako manifestazioan. Besteak beste, martxan ez ziren falta bilatu eta atxilotzeko agindua emanda duen Etxegarai auzokide eta preso ohiarekiko, epaituko dituzten Amnistiaren Aldeko Mugimenduaren kideekiko zein Anjel Figueroa eta Jon Bilbao Moro presoekiko elkartasun adierazpenak. Era berean, Auzitegi Gorenaren 197/2006 epaia edo Parot doktrinaren eta errepresioaren aurkako mezuak zein amnistiaren aldeko leloak eta herritar, eragile eta erakundeei zuzendutako deiak entzun ziren, presoen eskubideen bermerako konpromisoak har ditzaten. Bere aldetik, Fernando Etxegaraik manifestazioan parte hartu zuen, agindu zuen bezala atxilotu arte bizitza normala egiten ari baita Auzitegi Nazionalak askatu eta hiru hilabetera espetxe zigor osoa betearazteko atxilotze agindua sinatuta duen arren. Martxa batzokitik igaro zenean krispazio uneak izan ziren, hainbat lagunek EAJri "espainiarra" izatea leporatu ziotenean. Argazkia: Askatu.org.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun