Pasa den martxoaren 30ean Areetako geltokian mailu batez izan zen eraso saiakera salatzeko elkarretaratzea egin zuten Metro Bilbaoko langileek goizean. Arratsaldean, berriz, ELA, CIM, CCOO, UGT, LAB eta ESK sindikatuek osatutako Enpresa Batzordeak bilera egin zuen Julio Ibarra Metro Bilbaoko komunikazio eta segurtasun arduradunarekin. Langileek hilabete bateko epea eman zioten erasoen arazoan emaitzak aurkez ditzan. Izan ere, Txus Martin Enpresa Batzordeko bozeramailea eta ELAko ordezkariak azaldu zuenez, Areetakoa geltokirik "gatazkatsuenetariko bat" da, inguruan hainbat diskoteka eta afterhour egonda geltokira hurbiltzen diren hainbat bezero aurretik "alkohola ez ezik beste motako substantziak" kontsumitu egiten dituztelako eta haietako batzuek jarrera "oldarkorra" izan dezaketelako. Argazkian, otsailean ere elkarretaratzea egin zuten langileek toki berean / Metro Bilbaoko LAB.
Hori dela eta hainbat neurri zehatzak abian jartzea eskatu diote garraio enpresari, hala nola asteburuetan langile bakarra egon beharrean bizpahiruk jardutea, "bidaiarien kopuruaren arabera", Parisen egiten duten bezala. Horrek lagunduko luke ahozko erasoak zein fisikoak gutxitzeko eta bezeroei zerbitzua hobea eskaintzeko. Bestalde, zinpeko zaindari gehiago jartzea eskatu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun