Txakur edo katurik etxean nahi duten lagunen bila dabil Getxoko Udala

Erabiltzailearen aurpegia Ukberri 2008ko api. 8a, 21:51
Getxoko Udalaren Ingurumen Sailak informazio kanpaina abiatu du, Sopelako Gatzarriñe kaleko 36. zenbakian dagoen txakurtegitik (Telefono zenbakia: 946 765 579) etxera, txakur edo katuren bat eraman nahi duten herritarrei zuzenduta. Keltse Eiguren zinegotziak gaur azaldutakoaren arabera, "bizitza samurragoa izango dute horrela etxe-abereok". Animalietako bat eskuratu nahi dutenek, “aipatu udal zerbitzuko beharginek adopzio arloan eskaintzen dituzten aholkuak baliatu ahal izango dituzte eta etxeko abereak edukitzeko legeak ezartzen dituen osasun eta zaintza arloko berme guztiak betetzen dituzten animaliak eraman ahal izango dituzte”, tokiko arduradunaren hitzetan. Hau da, aukeratutako animalia parasituak kenduta, txertatuta, antzututa, garbi eta mikrotxiparekin emango dute. Etxabereok hartzen dituztenek, euren aldetik, animalia ondo artatu eta zaindu beharko dute, Ingurumen zinegotziak gogoratu duenez. Eskatzaileak adinez nagusiak izan beharko dira eta udal tasa ordaindu: 30 euro katu batengatik eta 60 euro txakurrarengatik. Argazkian, txakur bat / El Rincon de las Cuatro Patas
Maskota bat eduki nahi duten Getxoko bizilagunei zuzenduta dago kanpaina eta, horren bitartez, herritarren arreta erakarri nahi da txakurtegian adoptatzeko moduan dauden animalien irudiak eta ezaugarriak zabalduz. Izan ere, kanpainan zehar, 32.000 informazio eskuorri banatuko dira etxerik etxe, hainbat lekutan 300 kartel ipiniko dituzte eta, tokiko hedabideetan, telebista eta irrati iragarkiak emitituko dira. Getxo Irratian, "Getxoberri"-n eta www.getxo.net webgunean, ere lekua izango du ekimenak. Eigurenek emandako datuen arabera, iaz 47 txakur eta 52 katu eraman zituzten Sopelatik etxera getxoztarrek.
Jendartea Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun