Goizaldean ospitalera eraman eta berriro bueltatu dute espetxera Anjel Figueroa
Anjel Figueroa preso politiko algortarraren osasun egoera "egunetik egunera larriagotuz" doala ohartarazi du gaur Anjel kalera! herri ekimenak. Erakundeak egindako kronologiaren arabera, martxoaren 20an ospitaleratu behar izan zuten Txagorritxun (Gasteiz) eta, hurrengo egunean, Langraizko espetxera bueltatu zuten. Aste bete beranduago ere, hilaren 27an, ospitalera eraman eta apirilaren 4ra arte eduki zuten bertan. Apirilaren 7ko krisialdia, berriz, "oso gogorra" izan dela adierazi dute. "Hala ere, goizaldean ospitaleratu eta gauean bueltatu zuten Langraizera, sendagiria jasota", salatu dutenez. Bada, gaur goizaldean, sartu eta "pixka bat pasatu zaionean" itzuli egin dute kartzelara, "urgentziazko tratamendua ematearen ondorioz", herri ekimeneko kideek jakinarazitakoaren arabera. Bitartean, bihar iluntzerako (apirilak 11) Etxerat euskal preso politikoen senideen elkarteak deitutako elkarretaratzearekin bat egitera deitu ditu herritarrak Anjel kalera! herri ekimenak. Hurrengo ostiralean (hilak 18), berriz, manifestazioa izango da 20:30ean Algortako Telletxe plazatik abiatuta eta ekitaldia, ondoren, 21:00etan, Txiki Otaegi plazan. Azkenik, hilaren 24an, ostegunarekin, Figueroaren egoeraren gaineko hitzaldia egingo dute, 19:30ean, Algortako kultur etxean.
Langraizko espetxean eritegian da Josu Uribetxebarria preso gaixo arrasatearrarekin batera, ziega batean. "Azken horrek medikuei esan die Figueroaren biziarekin jolasten ari direla, eta erabaki bat hartu beharko dutela. Bestalde, espetxeko zuzendariak Madrilera txosten bat bidali ei du, algortarra kaleratzearen aldekoa", zehaztu du Anjel kalera! herri ekimenak. Txagorritxu ospitalean ere lehenengo graduko tratamendua ematen ari zaizkiola, eta horrek ere arazoak sortzen dizkiola salatu dute etxekoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun