Atzera bota dute Albaro Arriren babes helegitea
2008ko api. 10a, 22:44
Espainiako Auzitegi Konstituzionalak atzera bota du Albaro Arri Pascual "Muni" preso politiko algortarraren abokatuak ezarritako babes helegitea, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Hartara, 1994ko uztailaren 29an Madrilgo Ramales plazan gertatutako Francisco Veguillas Espainiako Armadako teniente jeneralaren eta bi lagunen hilketa leporatuta, Espainiako Auzitegi Nazionalak ezarri zion 208 urteko espetxe zigorra finkoa da jada. 2005eko irailaren 22ko epaiketan, "militarren ibilgailua igarotzen ari zela Madril komandoko kideei bonba eztandarazteko abisua ematea" egotzi zioten Arriri, Veguillas, auto-gidaria eta garraiolari baten heriotza eraginez. Abokatuek, baina, behin baino gehiagotan mahaigaineratu dituzte "prozesu honetan izandako akats ugari eta nabarmenak". Horretaz gain, "akusazioak izan zuen froga falta, torturaren bitartez eskuratutako deklarazio batzuekin ordezkatu zuten, nahiz eta deklarazio haiek bakarrik deklarazio polizialak izan, eta gainera, gero, epailearen aurrean ukatu eta adierazi eragindako torturen ondorio zirela", errepresioaren aurkako erakundeak berretsi duenez. Hala ere, 2007ko urtarrilaren bukaeran, Espainiako Auzitegi Gorenak ere atzera bota zuen abokatuen helegitea. Bitartean, 130 lagunek joan den ostiralean Algortako Telletxe plazan egindako elkarretaratzea.Etengaben plazaratutakoaren arabera, abokatuek "argudiatutakoa Auzitegi Konstituzionalak helegitea aintzat hartzeko behar beste edukinik ez" duela arrazoitu dute epaileek. Uribe Kostako AAMk nabarmendutakoaren arabera, "aipagarria da, Arnaldo Otegik egindako errekurtsoan gertatu bezala, Espainiako Auzitegi Nazionalak ia errekurtso guztiak atzera botatzen ari dela arazo administratiboak dituelako, besterik gabe". Ondorioz, "Espainiako Auzitegia gerra tresna hutsa" dela salatu dute. Bestalde, apirilaren 25erako mobilizazio eguna deitu du AAMk, Amnistiaren Aldeko Batzordeak (AAB), Senideak edo Askatasuna erakundeetan lan egindako 27 euskal herritarrei hilaren 21etik aurrera egingo dieten epaiketaren harira. Jagoba Terrones berangoztarra eta Mitxel Sarasketa getxoztarra daude epaituko dituzten lagunen artean. Alderdi Popularrak, baina, protestak eragozteko eskatu dio Eusko Jaurlaritzari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun