Abian da euskara hutsezko Interneteko Ibaizabal telebista bilbotarra
2008ko api. 11a, 14:16
Bilboko Kafe Antzokia gainezka zegoela aurkeztu zuten joan den asteazkenean, apirilak 9, hiriburuko informazioa eta aisialdia euskara hutsez jasotzeko helburua duen Ibaizabal Internet bidezko telebista. Hamaika Telebista Hedatzeko Taldearekin lankidetzan, Bilbo, Ezkerraldea, Enkarterriak, Uribe Kosta, Txorierri, Mungialdea eta Hego Uribeko zonalde zabal baterako emitituko duen euskarazko telebista sustatzeko xedearekin jaio zen Ibaizabal-Mendebalde. "Egitura hori martxan jarri genuen, baina aukera teknologiko berriak zeudela ohartuta, Internetek eskaintzen duen azpiegitura baliatzea erabaki genuen herri telebista egiteko", azaldu dute elkartekoek. Nahiz eta orain bi proiektu horiek dituzten eskuartean, badirudi, momentuz, Bilbo hiria ez den guztia aparkatzeko erabakia hartu dutela. Horrela igarri zen aurkezpenean eta hortik etorri zaizkie kritikarik handienak. Eurek ere Ibaizabal albo bietako esparru zabal hori hartuko duen telebista abian jartzeko "oraindik lan handia egiteke" dagoela aitortu zuten aurkezpenean. Gutxienez, aipatu bi eragilek sortutako Bilbo Handia Ikusentzunezkoak SA enpresak Getxo, Bilbo, Barakaldo eta Mungia izeneko eskualdetan emititu ahal izateko lizentziak baditu jada eta, orain, harpidetza kanpaina abiatu dute baliabide ekonomikoak lortzeko.Ibaizabal Interneteko bidezko telebistaren programazioa murritza da oraindik, baina dagoeneko hasi dira Bilboko gaurkotasunari lotutako erreportajeak ematen. Hilean behin berritu nahi dituzte. Musikari ere egingo diote tartea hasieratik. Grabatutako kontzertuak eskaini eta talde horiei buruzko informazioa emango dute. Haurrentzako emankizunak ere abiatu dituzte. Ibai eta Zabal telebistako maskoten laguntzaz esketxak prestatuko dituzte. Aurrerago helduko dira gazteek ekoitzitako emanaldiak, luze gabe. Horiekin batera agenda zabal bati lekua egingo diote, eta, gainera, "salaketa eta aldarrikapenerako tarte bat gordeko" dutela jakinarazi dute. Luzera begira ere pentsatzen hasi dira, eta, Irratia.com egitasmoarekin batera, saio bat egiteko asmoa dute. Datorren ikasturterako finkatu nahi dituzte emankizunok.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun