"Alegiazko liburua" antzezlana taularatuko dute igandean Kultur Leioan La Baldufa katalanek
2008ko api. 11a, 21:21
La Baldufa talde katalanak "Alegiazko liburua" izenburuko antzezlana eskainiko du igande honetan, apirilak 13, 12:00etan hasita, Kultur Leioa aretoan. Saioa euskaraz izango da, eta sarrerak 4 euroko prezioan, BBKren orotarako kutxazainetan, 944 310 310 telefono zenbakian, www.bbk.es webguan eta txarteldegian lortu daitezke, tokiko kultur iturriek adierazi dutenez. Antolatzaileek arabera, "Alegiazko liburua" antzezlana "jende guztiarentzako bidaia da, diziplina askotako ikuskizuna, abentura eta utopiarako deia izan nahi duena". "Muntaiaren protagonistak existentzia monotonoa eta aspergarria dauka. Bulego batean egiten du lan eta egunero zeregin berberak errepikatzen ditu. Orduan, liburu bat helduko zaio eskura, eta liburuaren irakurketak mundu berri baten ateak irekiko dizkio: irudimenaren, abenturaren eta bidaiaren mundua", azaldu dute. Hiru istorio batean biltzen ditu antzezlanak, zeinean gizon eta emakumeen kezkak islatuta aurkezten diren. Luis Zornozaren zuzendaritzapean, Enric Blasi, Emiliano Pardo, Carles Pijuan eta Carles Benseny dira antzezleak. Bestalde, gaur bertan, 20:30ean, Ken Zazpi talde gernikarraren azken diskoaren aurkezpenarekin zuzenean gozatzeko aukera egongo da, 10 euroren truke, Kultur Leioan.Aipatu bi ekitaldiak "Apirila euskaraz blai" jardunaldien barruan antolatu dituzte Leioako Udalaren Kultura Saila eta Euskara Zerbitzuak. Ekimen horren harira, hilabetea amaitu bitartean, zinema, erakusketa, musika, bertsoak eta antzerkia izango dira Kultur Leioan. Ekitaldiekin jarraituz, apirilaren 19an, larunbatarekin, musika eta bertsoak uztartzen dituen "Gu ta gutarrak" ikuskizuna hartuko du kultur areto leioaztarrak, 20:00etan. Sarrerak 5 eurotan egongo dira. Biharamunean, "The horror bus" izenburuko filma edukiko dute 7 urtetik gorako neska-mutilek, 12:00etan eta 17:00etan, 3 euroren truke. 20:00etan, berriz, "Querida Bamako" pelikula proiektatuko dute (3 euro) entzungelan; baina astelehenean ere. Bestalde, zinema Lehen eta Bigarren Hezkuntzako zentroetara ere helduko da, ikasleei bereziki zuzendutako film aukeraketa batekin. Horrela, pelikula horiek ikastetxean bertan ikusteko aukera izango dute ikasleek, tokiko iturriek adierazi dutenez. Azkenik, zinemaz gozatzen jarraitzeko aukera ere egongo da "Azur eta Asmart" pelikularen gaineko erakusketaren bitartez, ambigun ikusgai apirila osoan zehar. Antzerkiari dagokionez, hilaren 25ean berriz Tanttakaren "Arrainen bazka" taularatuko dute, eta 27an Txefo eta Anduriña ipuin kontalariak "Eo...hemen nago!" saioa eskainiko dute. Lehenengo ikuskizuna, helduentzako, 20:30ean emango dute, 12 euroren truke. Bigarrena, berriz, 12:00etan izango da, 2 eurotan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun