Erandioko Udal Gobernuak gizarte politikaz egiten duen kudeaketa arbuiatu du Javier Ruiz Erandioko PPren bozeramaileak. Ruizek azaldu duenez, Erandioko Udalak ematen dituen gizarte laguntzak –Oinarrizko Errenta eta Gizarte Larrialdi Laguntzak– %70ean igo dira azken bost urteotan, inguruko udalerriek izan duten igoera baino dezente handiagoa. Zehazki, PPren datuek diote laguntza horiek %4 igo direla Barakaldon, %8 Portugaleten, %14 Santurtzin, %20 Basaurin eta %30 Sestaon. Guztira, laguntza horiek emateko 2003tik hona Erandiok 16 bat milioi euro jaso ditu. Javier Ruizen aburuz, "zenbaki hauek kezkagarriak dira oso, Erandion gizarte bazterketan dabiltzan pertsonen kopurua nabarmen igo den adierazlerik onenak baitira eta, gainera, gehikuntza hori Bizkaiko udalerri gehienetakoa baino handiagoa izan delako". PPren ustez, datuek frogatzen dute gizarteratze politikak, eta, batez ere, enplegu politikak "ez dabiltza, gizarte bazterketan bizi diren pertsonak lan merkaturatzeko helburua bete beharrean, pertsona horien kopurua nabarmen zabaldu delako".
Gobernu Taldearen "nagikeria" frogatu nahian, beste datu batzuk eman ditu Ruizek, gizarteratze hitzarmenenak, alegia. 2006an 32 hitzarmen sinatu baziren, 2007an erdira jaitsi zuen kopuru hori, 15 hitzarmenekin. Gainera, PPk salatu du orain arte 183 hitzarmen baino ez direla sinatu, beren ustez 650 izan beharko liratekeela, kopuru hori baita Oinarrizko Errenta kobratzen dutenen zenbakia eta, beraz, "gizarteratzea eskuratzeko ezinbesteko urrats bezala" hitzarmen horiek sinatuta izan beharko lituzketenak. Bestalde, Etxez Etxeko Laguntza Zerbitzuaren funtzionamendua ere kiritikatu dute, itxaron-zerrendan daudenen kopurua %40 hazi delako, 2006ko 30 pertsonetatik 2007ko 43ra. Eta, gainera, erabiltzaileen kopurua %5a jaitsi da bitartean. Horregatik Udal gobernuari "behar diren neurriak har ditzan" eskatu diote, "udalerriko gizarte laguntzak hobetzeko eta, zehazki, Etxez Etxeko Laguntza Zerbitzua, bere ordutegia zabalduz, asteburuetara luzatuz eta itxaron-zerrenda laburtuz, udalerriko agure askorentzako garrantzi handiko zerbitzua baita".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun