Urduliztar bat atxilotu dute emakumea jo eta ertzainak sukaldeko labanaz mehatxatzea egotzita
2008ko api. 15a, 19:41
Atzo arratsaldeko lau t'erdiak aldera, Urdulizko baserri batean erasoa gertatzen ari zela ohartarazi zioten Ertzaintzari, Eusko Jaurlaritzako Herrizaingo Sailak jakinarazitakoaren arabera. Antza denez, gizonezko batek ondoko etxebizitzaren jabea, emakumezkoa, jo eta mehatxatu zuen makila batez. Gertakariaren berri izan zuenean, patruila-auto bat bertara abiatu zen, eta, baserrira heltzen ari zela, furgoneta batekin topo egin zuen aurrez aurre. Ibilgailu horrek polizia autoari pasatzen uzten ez zionez, ertzainek larrialdi zerbitzuan zihoazela esan zioten gidariari, eta bidea libre uzteko eskatu zioten, polizia iturriek gaineratu dutenez. Gidariak ezetz esan zien, anbulantzia bat bidean zetorrela eta zauritutako emakumezko bat artatu behar zuela azaldu bazioten ere. Jarrera horren aurrean, ertzainetako bat autotik jaitsi eta, furgonetara hurreratzen ari zela, gidariak sukaldeko labana batez mehatxu egin zion.Gainera, bide erdian geratzeko asmoari eutsi zion. Ertzainek labana kanpora jaurtitzeko eskatu zioten susmagarriari hainbat aldiz, eta, azkenik, egin zuenean, geldiarazi eta identifikatu egin zuten. Jarraian, apur bat lehenago baserrian izandako erasoa pertsona horrek berak egin zuela jakin zuten, baita biktimak lepoan kontusio handi bat zuela ere. Emakumezkoa ospitalera eraman behar izan zuten. Egoera horren aurrean, ustezko erasotzailea atxilotu eta polizia egoitza batera eraman zuten, bertan dagozkion eginbideak betetzeko. Hurrengo orduetan, atxilotua Agintaritza Judizialaren esku utziko dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun