Euskal Herriko Gazteriaren Kontseiluak zabaldutako informazioa:
Aurkezpena. Etxebizitza Eskubidea Gazte Topaketak
eHgk-k Etxebizitza Eskubidearen Gazte Topaketak antolatzeko ideiari heldu zion urte hasieran. Geroztik, talde ezberdinekin elkarlanean, hauen prestaketa lanetan ari gara.
Honakoak dira bete nahi ditugun helburuak:
- Ahalik eta gazte espresio gehien elkarrekin biltzea.
- Etxebizitza Eskubidearen gaineko oinarrizko irakurketa adostea.
- Indarrak metatzeko praktiketan sakontzea. Talde bakoitzak beretik eraginez, nola lortu guztiok norabide berean tira egitea?
- Gure kabuz eskubideak eraikiz, alternatiben bidean sakontzea.
Parte hartzeko:
Posta zerrenda: Etxebizitzaren gaia lantzen duten gazte taldeen posta zerrenda osatu dugu. Bertan, Topaketen bileretan landu diren edukiak zabaltzen ditugu, taldeak informatzeko eta guztiok gure ekarpena egin ahal izan dezagun. Irakurri, eztabaidatu eta egin zuen ekarpena! Guztiok gara eHgk.
Posta zerrendan ez bazaudete, idatzi eHgk@eHgk.org helbidera.
Laster http://www.etxebizitza.ehgk.org helbidea jarriko dugu martxan.
Maiatzak 10, Bilbo. Hau aldatzera goaz! Etxebizitza Eskubidearen Gazte Topaketak
Goizeko 10:00etan hasita, eguneko egitaraua bost atal nagusitan banatu dugu.
Lehenik, gaiaren kokapen orokorra eta eskubide urraketa honen testuingururen azterketa azkarra egingo dugu, hitzaldi bidez.
Ondoren, talde txikietan banatu eta etxebizitzari loturiko gai zehatzetan sakonduko dugu (okupazioa, emakume gazteak, etorkin gazteak, turistifikazioa eta etxe hutsak, nekazari gazteak, udal politikak...). Egoera zein den eta nola alda dezakegun aztertuko dugu.
Bazkariaren ostean, taldeen txanda izango da. Aurrez adostuko dugun gidoi bati jarraiki, eragile ezberdinen arteko eztabaida bultzatuko dugu. Bakoitza bere bidea eginez, nola lortu dezakegu etxebizitza eskubidearen alde guztiok norabide berean indarra egitea? Nola eraginkortu dispertsaturik dauden indar guztiak? Buruari eragin eta egin zuen ekarpena.
Arratsaldeko azken saioan, Euskal Herrian eta nazioartean alternatibak eraikiz garatu diren esperientzia ezberdinak ezagutzeko aukera izango dugu. Amaitzeko, plenarioan eguneko ekarpen eta ondorio nagusiak jasoko ditugu. Eta ondoren, jaialdia!
Kukutza gaztetxean kontzertuak eta jaialdia antolatuko ditugu.
* Egun osorako edo saio solteetara joateko aukera egongo da.
* Bazkarira geratuko bazarete, aldez aurretik, eHgk@eHgk.org helbidera idatzi jende kopurua adieraziz.
* Euskaraz ulertzen ez duen pertsonarik badago, aldez aurretik adierazi ere.
Guztion konpromiso eta ekarpena
Elkarlana da Topaketa hauen funtsa. Talde eta norbanakoen konpromisoari esker soilik atera ahal izango ditugu aurrera. Topaketetarako deia lau haizeetara zabaldu dezagun. Igorriko ditugun bitarteko ezberdinak (kartela, gonbidapena, esku orria, kuña, banerra...) guztion artean zabaldu behar ditugu.
Egunean sortuko diren lan ezberdinetan lagundu (bazkaria zerbitzatu, eskola garbitu, lan taldeak dinamizatu...).
Ekarpen ekonomikoa eginez. Xumea bada ere, eskertuko dugu!
Euskal Herriko Gazteriaren Kontseilua
Etxebizitza topaketetan parte hartzera deitu du Euskal Herriko Gazteriaren Kontseiluak
Datorren maiatzaren 10ean, larunbata, Bilbon ospatuko diren Etxebizitza Eskubidearen Gazte Topaketetara hurbiltzeko gonbitea egin die gazte talde eta gazte guztiei Euskal Herriko Gazteriaren Kontseiluak. EHGK-k zabaldu duenez, "Topaketa hauetan ahalik eta gazte talde gehien bildu nahi dugu, guztion elkarlanaz etxebizitza eskubidearen baitan urrats esanguratsuak eman ditzagun" . Hori dela eta Uribe Kostako eta Euskal Herri osoko gazte taldeengana jo dute "gazteriaren artean topaketetarako deia lau haizetara zabaldu" dezaten. Era berean, maiatzaren 10eko mintegiaren helburuak finkatu dituzte eta topaketen gaineko informazioa eman dute Gazteria Kontseilutik. Argazkian, Bilboko Erriberako etxe okupatuak 2007ko abenduaren 28an hartu zuen itxura hainbat urtez hutsik egon ostean. Eraikina, baina, atzo hustu zuen Ertzaintzak, hainbat gazte epaiketaren zain daudela / Bilboko Okupazio Mugimendua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun