Hiru gazte atxilotu dituzte Uribe Kostan eta Erandion izandako hainbat atrakuren egileak direlakoan
2008ko api. 16a, 22:25
Ertzaintzak 19 urteko I.S.J. gaztea eta adin txikiko beste mutil bat atxilotu ditu 13:00ak aldera, besteak beste Sopelako gasolindegi, Erandioko ostalaritza establezimendu eta Plentziako banketxe batean izan diren atrakuetan nahasita daudelakoan. Atzeman dituztenean, susmagarriak lo egiteko atondutako furgoneta batean zeuden, Zorrotza (Bilbo) kanpoaldean, ustez isilpean bizi zirela, Eusko Jaurlaritzako Herrizaingo Sailaren arabera. Gogoratu beharra dago, Bizkaiko hainbat ertzain etxetako agenteek abiatutako ikerketaren ondorioz, 19 urteko M.S.G. ere atxilotu zutela igandean Sestaon. Gainera, taldeko beste bi kide identifikatu zituzten orduan, polizia iturrien arabera. Identifikazio horien bidez, bietako bat urtarrilaren 23an beste delitu batzuengatik Martutenen (Donostia) espetxeratu zuten, eta bestea adingabeen babeserako zentro batean zegoela jakin zuten.Guztiei azken hilabeteotan Bizkaiko hainbat gasolindegietan egin diren hamar bat atrakuren egileak izatea leporatzen diete; Santurtzi, Zamudio, Trapagaran, Sopela eta Bilbon, besteak beste. Azken bi horietan pistola bat baliatuz egin zuten lapurreta. Horretaz gain, indarkeriaz egindako zenbait lapurreta egotzi dizkiete. Horien artean, Erandioko ostalaritza establezimendu batean iragan urtarrilean izandako atrakua eta Zorrotzako (Bilbo) saltoki batean larderia erabiliz egindako hiru lapurretak nabarmendu ditu Herrizaingo Sailak. Otsailaren bukaera aldean Plentziako banketxe bat indarra erabiliz lapurtu zutela diote polizia iturriek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun