Jaialdia ostiralean, apirilak 18, hasiko da, Ana Vega Toscano piano-jolearen eskutik. Musikariak “Compositoras a traves del siglo XX” izenpeko egitaraua eskainiko du eta horretan Maria Rodrigo, Emiliana de Zubeldia, Emma Chacon, Maria Teresa Prieto, Germaine Taillaferre, Elena Romero, Gisela Hernandez, Maria Luisa Ozaita eta Encarna Beltran musikagileen piezak bildu ditu, besteak beste. Biharamunean, larunbatean, Maria Jose Sanchez sopranoak eta Sebastian Marine piano-joleak osatutako bikoteak musika eta ahots errezitaldia eskainiko dute, “Nanas, desvelos, sueños” izenburukoa. Horretan, honako musikagile hauen piezak biltzen dira: Matilde Salvador, Carmen Santiago de Meras, Elena Romero eta Mel Bonis, gehienak Juan Ramon Jimenez, Federico Garcia Lorca, Carmen Conde eta Juan del Enzinaren testuetan oinarritutakoak.
Azkenik, jaialdia igandean, apirlaren 20an, amaituko da La Veneranda hirukotearen eskutik. Maria Jose Sanchez sopranoak, Miguel Angel Tallante klabezin-joleak eta Guillermo M. Concepcian biolontxelo-joleak osatzen dute taldea eta Barrokoko hiru musikarien piezak joko dituzte: Francesca Caccini, Elisabeth Jacquet de la Guerra eta Barbara Strozzi, hain zuzen ere.
Apirilaren 18tik 20ra, Emakumeak Musikan VIII. Jaialdia izango da Areetako Andres Isasi musika eskolan, izen bereko elkarteak antolatuta eta Getxoko Kultur Etxeak lagunduta. Aurtengo jaialdiko ardatza bi musikarien jaiotzaren urteurrenaren ospakizuna izango da: Elena Romero musikagile, piano-jole eta orkestra zuzendariaren jaiotzaren mendeurrena eta Mel Bonis artista frantziarraren jaiotzaren ehun eta berrogeita hamargarren urteurrena. Lehenengo bi egunetan kontzertuak 20:00etan hasiko dira; hirugarrenean, berriz, 19:00etan hasiko da saioa. Gonbidapena, doakoa, Algortako kultur etxean (Villamonte) jaso daiteke. Emakumeak Musikan elkarteak errezitaldiak eta hitzaldiak eskaintzen ditu historiako zenbait garaitako emakumeen musika ezagutzera emateko. Horrezaz gain, emakumeek osatutako iraganeko eta gaurko musika ikertu eta katalogatzen ditu, besteak beste. Argazkian, azken egunean arituko den La Veneranda taldea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun