"Gu ta gutarrak" ikuskizuna eskainiko dute larunbatean Leioan

Erabiltzailearen aurpegia Ukberri 2008ko api. 17a, 16:03
Larunbat honetan, apirilak 19, "Gu ta gutarrak" ikuskizuna hartuko du Kultur Leioak. Igor Elortza eta Unai Iturriaga bertsolariek eta Josu Zabala, Aitor Rubio eta Alex Ruiz de Azua musikariek 90 minutuko iraupena duen ikuskizuna eskainiko dute. Bertsoak eta musika ditu oinarri, emanaldian hamar-hamaika bertso sorta musikatuta eta bat-bateko bertso batzuk ere kantatuko baitituzte. Egileen hitzetan, "gutako bakoitzak hamaika gutar ditu bere baitan: gutar ameslaria, gutar axolagabea, gutar zintzoa, gutar eszeptikoa, gutar parrandazalea, gutar gaiztoa, gutar politikoa, gutar lotsatia, gutar sexuala, gutar nagia, gutar eroa...". Saioa 20:00etan izango da eta sarrerak 5 eurotan daude salgai. Biharamunean, berriz, "The horror bus" izenburuko filma edukiko dute 7 urtetik gorako neska-mutilek, 12:00etan eta 17:00etan, 3 euroren truke. Eta 20:00etan "Querida Bamako" pelikula proiektatuko dute (3 euro) entzungelan; baita astelehenean ere. Argazkia: Jabi Zabala.
Aipatu ekitaldiak "Apirila euskaraz blai" jardunaldien barruan antolatu dituzte Leioako Udalaren Kultura Saila eta Euskara Zerbitzuak. Ekimen horren harira, hilabetea amaitu bitartean, zinema, erakusketa, musika, bertsoak eta antzerkia izango dira Kultur Leioan. Ekitaldiekin jarraituz, hilabete osoan zehar zinemaz gozatzen jarraitzeko aukera ere egongo da, "Azur eta Asmart" pelikularen gaineko erakusketaren bitartez. Antzerkiari dagokionez, hilaren 25ean Tanttakaren "Arrainen bazka" taularatuko dute, eta 27an Txefo eta Anduriña ipuin kontalariak "Eo...hemen nago!" saioa eskainiko dute. Lehenengo ikuskizuna, helduentzako, 20:30ean emango dute, 12 euroren truke. Bigarrena, berriz, 12:00etan izango da, 2 eurotan.
Kultura Leioa
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun