Egindako salaketak arrazoitzeko "pisuzko argudioak" eman ditu Leioako alkateak: batetik, zegokien hauteskunde kanpainan, Leioa Abian ezker abertzaleko herri plataformak (2003) zein Eusko Abertzale Ekintzak (2007) Avanzadako auzia erabili zutela gogoratu du Arruebarrenak. Bestalde, "plataformako batzarretarako kartelak jartzen aritzen zein Sakonetan batzartzen diren hiruzpalau lagunak kaleak Batasuneko afitxez betetzen ibiltzen diren berberak" direla adierazi du udal agintariak. Gaineratu duenez, "hauteskundeetan Leioa Abian zein EAEren zerrendaburua izandakoa" ere badago horien artean. Bestalde, berarekin biltzeko ekintzaileek eta auzotar elkarteak aurkeztutako eskaera bana erakutsi du Arruebarrenak, "bien artean alderik ez (sinadura, egitura, hitzak...)" dagoela adieraziz.
Hitzarmenak gora behera
Avanzadako errepideko itxi gabeko zatiak estali eta lur azpiko oinezkoentzako pasabideak gainetiko pasabideekin ordezkatzeko bidean, Leioako Udalbatzak hartutako lehenengo erabakia 1998ko azaroaren 5ean heldu zela erantzun dio auzotar elkarteari Arruebarrena alkateak. Horren gaineko azterketa lehiaketara ateratzea onartu zuten orduko osoko bilkuran. "80 eta 90eko hamarkadetan Udalak ezin zuen erabaki exekutagarririk hartu, batik bat, Avanzadaren eskuduntza Bizkaiko Foru Aldundikoa delako", tokiko agintariak azaldutakoaren arabera. Txostena eskuan, bospasei hilabete beranduago etorriko zen Aldundiarekin adostutako aurre-hitzarmena, Mendibilen eta Artatzan pasabideak jarri eta itxi gabeko zatiak estaltzeko asmoz; 1999ko ekainaren 10ean Udalbatzak begi onez ikusi zuena. "Kontua da orduan Montblanc-eko tuneletan tragedia gertatu zela eta ondoren ezarri zuten Europa mailako arautegi berrira egokitu behar izan dugula adostutakoa", azaldu du Arruebarrenak. Azkenik, 2006an sinatu zen Udala eta Aldundiaren arteko hitzarmena. "Hortik etorri da igogailua jartzen dutenean zabalduko dugun Mendibileko pasabidea. 2008rako, berriz, irtenbidea bilatu nahi diegu itxi gabeko zatiei.
"Batasunaren mozorro" izatea egotzi die Avanzada estaltzearen aldeko auzotarrei Leioako alkateak
Avanzadako errepidea estaltzearen aldeko plataformak egindako azken adierazpenei erantzuteko ez ohiko prentsaurrekoa deitua zuen gaurko Eneko Arruebarrena Leioako alkateak. Hitza hartu bezain laster, "Batasunaren beste mozorro bat besterik ez" izatea leporatu dio "bere burua auzotar elkartetzat" duen taldeari. "Ekologia, euskara, antimilitarismoa... euren nahietara erabiltzen dituzte etengabe, liskarra eta ezinegona eragiteko; unean uneko gaia axola ere ez zaiela", esan du udal agintariak. Gauzak horrela, "gezurtitzat" jo ditu plataformako kideak. Are gehiago. "Herrikideen erailketa, mehatxua eta bortxakeria justifikatzeko inolako arazorik ez dutenek are gutxiago dute gezurrak esateko", gaineratu duenez. Hala ere, Avanzada estaltzeko eskatuz sinatzeko eskubidea aitortu die auzotarrei Arruebarrenak. "Elkarte horren atzean nortzuk dabiltzan jakiteko eskubidea dute leioaztarrek eta hori jakinaraztea da prentsaurreko honen helburua", amaitu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun