Bitartean, Isaias Carrascoren hilketak duen itzal politikoa luze jo du eta EAJk PSE-EErekin adostutako "udal gobernu etikoak" sortzeko mozioek ibilbide luzea izango dute, bitartean ezker abertzaleak, EAk eta enparauek GALen hilketak, Ajuria Eneako Itunaren "remake"-a, "EAJren Alderdien Lege propioa" edota biktimen artean eragiten diren bazterkeriak hizpide dituztela. Tartean ere, alderdien ilegalizazioak aurrera darrai, oraindik hartu ez dituen erakundeetan ere "apartheid"-a eragiteko eta proiektu politiko zehatzak suntsitzeko, eta bidean zeharkako kalteak sortzen, besteak beste, Ibarretxe, Lopez, Atutxa, Bilbao edo Knorri.
Gutxi izango balitz, astelehenean Amnistiaren Aldeko Batzordeak eta Askatasunaren aurkako epaiketari ekingo diote Espainiako Nazio Auzitegian. Haika eta Segiren aurkakoan zein 18/98 auziko lagunen kontrakoan bezala, euskaldun gutxik sinesten du epaiketa garbia edo bidezkoa izan daitekeenik eta kiniela guztietan auziperatuak egun itzalpean dauden 735 euskal preso politikoekin batuko direla agertzen da. Zalantza bakarrak dira AAMko kideak espetxeratzean gatibuen kopurua zenbatetan handituta egongo den; Parot doktrina jarraituz zenbat laguni bizi arteko zigorra ezarriko dioten; egungo 12 preso gaixo kroniko eta sendaezinak, tartean Anjel Figueroa algortarra, egun hori ikusiko duten eta sakabanaketaren politikak presoen senideen eta lagunen zenbat bizitza eramango dituen "errepide istripuak" deitzen dituzten horietan.
Iñigo Fernandez de Martikorena: "eskubide urraketez (gehiago) betetzen ari da Euskal Herria"
Txiroek, emakumeek, euskaldunek, homosexualek, euskalduntzen ez duten hezkuntz ereduen ikasleek, ezgaitasun fisiko edota psikikoak dituztenek eta baztertutako beste sektore guztiek pairatzen dituzten eskubide urraketez gain, azken asteotan inoiz baino ageriago geratzen ari da "euskal gatazka" deritzotenari lotutako eskubideen urraketak gero eta jende gehiagorengana heltzen direla. Gaur goizean, eta aurreko hilabeteetan dozenaka lagun eraman dituztela, 13 gazte atxilotu ditu Espainiako Poliziak Oiartzunen, Oreretan eta Arrasaten, haietako hamarri kale indarkeria eragitea egotzita eta beste hiruri berriz Poliziari aurre egitea leporatuta. Itzubaltzeta / Romoko Segik "muntaia polizial-judiziala" salatu egin du, gogoratuz atxilotuei orain arte Segiko kideak izatea baino ez dietela egotzi. Gainera, aurreko sarekadetan nabarmenak izan dira torturaren lekukotasunak eta baita aztarnak ere. Atzo, berriz, amorrua PSE-EEk dituen herriko etxeetara eta ertzain-etxeetara heldu zen, Bilboko Abusu auzoko PSE-EEren egoitzan ustez ETAk jarritako lehergailua dela medio, zeinak zazpi ertzain zauritu zituen eta dagoeneko dozenaka "arbuio eta gaitzespen" adierazpenak eragin dituena. Konponbideak jarri ezean gaurko zein atzoko egoerak maiz errepikatzeko arriskua dagoela jakiteko ez da oso azkarra izan behar. Argazkian, gaurko atxiloketak salatzen dituen kartel bat, Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun