Atzo Altzagan sinadura mahaira hurbildu ziren gehienek atoan paper gainean errubrika jartzeari ekin bazioten ere, elkarrekin kalakan ibili zirenak ere izan ziren. Adibidez, bere burua jeltzale gisa agertu zuen heldu koadrilan batzuek EAJren aurka izatea egotzi zioten sinadura bilketari eta beste batzuek, berriz, EAJren norabideaz duten kezka azalduz koadrilakideei aurre egin eta sinatu zuten orria.
Auzokideek zabaldutako oharra:
Geurea, ikurrina
Erandioko udaletxean Espainiako bandera jartzeko agindua eman dute. Aginte judizialaren eskutik etorri da agindua, Espainiako Gobernuaren ekimen politikoari jarraituta.
Eta agindua betetzeko asmoa duela esan du alkateak.
Beraz, ez badugu ezer egiten, laster ikusiko dugu Espainiako bandera udaletxeko balkoian.
Eta argi dago bandera horrek zer esan nahi duen. Bilboko lehen alkate frankista izan zen Jose Maria Areilzak argi eta garbi esan zuen 1937ko ekainean; Espainiako bandera udaletxeko balkoian jartzen zuela Bilbo odolez eta suz menpean hartu ondoren.
70 urte geroago inposaketaren eta errepresioaren ikur izaten jarraitzen du "piper potoak", gatazka, samin eta enfrentamendu sortzaile.
Eta berriro ere indarrez inposatu nahi digute bandera.
Horregatik, sinadura bilketari ekingo diogu, udaletxean ez dugula bandera espainiola jartzerik nahi adierazteko, eta alkateari horixe eskatzeko.
Mikel, ez jarri bandera espainiola.
Udaletxean Espainiako bandera jar ez dezaten sinadurak batzen ari dira erandioztarrak
Erandioko auzokideek sinadura bilketari ekin zioten atzo, Mikel Arieta-Araunabeña alkate jeltzaleari udaletxean "inposaketaren eta errepresioaren ikurra" den Espainiako bandera jar ez dezan eskatzeko. Izan ere, Espainiako Gobernuaren Ordezkaritzak berriki eraman du epaitegietara Erandioko Udala, orain arte bandera hori eta gorria uneoro ez jartzeagatik. Salaketa Bilboko Administrazio-Auzietarako Epaitegiak tramitera onartu eta ikerketa abiatu zuen, aurretik Bilbon Espainiako Auzitegi Gorenak agindu ostean Iñaki Azkuna bertako alkateak Espainiako bandera jarriz amaitu zuen prozesuaren antzera. Baina, Bilboko aurrekaria ikusita, Erandioko auzokideak dagoeneko kalera irten dira eta atzo dozenaka sinadura bildu zituzten Altzagako metro geltokiaren lurzoruan, gaur goizean Astrabuduan izango dira eta datorren larunbatean, goizez ere, Erandio Landan batuko dituzte sinadurak. Ekimenaren antolatzaileen arabera Arieta-Araunabeñak dagoeneko jaso du "bandera jartzeko agindua" eta "betetzeko asmoa duela esan du alkateak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun