Ur Korronte kolektiboren kidea den Josuk azaldu duenez, taldea ekologian interesatuta zeuden eta Amalurra defendatzeko grina zeukaten Uribe Kostako hainbat lagunek, gehienak gazteak, sortu zuten pasa den urtarrilean, batez ere eskualde honetan proiektu "txikitzaileek" izan dezaketen eraginaz kezkatuta. Handik hona, Itzubaltzeta gaztetxean bildu dira. Oraingoz lan esparrutzat hartu dituzten proiektu zehatzak Abiadura handiko Trena, Lur Zati Plana, Lemoizko zentrala eta Super Sur deritzoten errepidea egiteko egitasmoa dira. Ur Korronte erakunde independentea da eta ez dago lotuta Eguzki, Ekologistak Martxan edo beste ohiko talde ekologistekin.
Proiektu txikitzaileen aurkako astearen egitaraua:
Apirilak 22, asteartea:
- 19:30ean, AHTri buruzko hitzaldia AHTren aurkako asanbladaren eskutik, Leioako Udondo gaztetxean.
Apirilak 23, asteazkena:
- 19:30ean, Uribe Kostako LZPri buruzko hitzaldia Christian Reinickeren eskutik, Algortako Txiki eta Otaegi plazan.
Apirilak 24, osteguna:
- 19:00etan, "Proiektu txikitzaileen aurrean zer egin?" mahai-ingurua, Leioako Udondo gaztetxean.
Apirilak 25, ostirala:
- 19:00etan, "Itoitz hustu arte" bideo-foruma Julio Villanueva Itoitzeko Solidarioen kidearen eskutik, Itzubaltzeta / Romoko Itzubaltzeta gaztetxean.
Apirilak 26, larunbata:
- 11:00etan, proiektu txikitzaileen aurkako bizikletada Urdulizko metro geltokitik. Ibilbidea: Urduliz, Berango, Algorta, Leioa eta Itzubaltzeta / Romo.
- 13:00etan, luntxa, Itzubaltzeta gaztetxean.
- 18:00etan, "AHT gelditzea badago: Val di Susa-ko borroka" bideo emanaldia.
- 20:00etan, kontzertua Garagardo gura, Feos pero majos eta SKT sekuentzia taldeekin, Itzubaltzeta gaztetxean. Ondoren, jaialdia.
Bihar, asteartea, abiatuko dira Leioan Uribe Kostan zehar garatuko diren "proiektu txikitzaileen" aurkako Euskal Herriko lehenengo jardunaldiak. Ekimena urtarrilean sortu zen Ur Korronte Uribe Kostako talde ekologista berriak jarriko du martxan eta larunbatera arte luzatu da. Bost egun horietan jendarte erantzun handia duten hainbat azpiegitura izango dituzte hizpide. Esate baterako, Abiadura Handiko Trena, Uribe Kostako Lur Zati Plana (LZP), Itoitzko urtegia eta horiek bezalako proiektuen aurka zelan borrokatu eztabaidagaiak izango da Udondo eta Itzubaltzeta gaztetxeetan zein Algortako Txiki eta Otaegi plazan egingo diren hitzaldi, bideo-forum eta mahai-inguruetan. Gainera, bestelako ekintzak ere izango dira larunbatean, tartean Urdulizetik eta Itzubaltzeta / Romoraino egingo den bizikletada edo azken herri horretako gaztetxean burutuko den kontzertua eta jaialdia. Argazkian, ekologistek AHTrentzako lur desjabetzak oztopatu zituzten Eskoriatzan pasa den asteartean / AHTren aurkako asanblada.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun